羅蘭對歐陽佩珊病逝覺得好可惜、好突然。(資料圖片)(蘋果日報)
魯振順表示唔相信一個咁強勁嘅氣功師會有咁嘅結果。(資料圖片)(蘋果日報)
黃淑儀同歐陽佩珊好耐冇見,覺得好婉惜。(資料圖片)(蘋果日報)
香港資深藝員歐陽佩珊,今日傳出死訊,終年63歲,而歐陽佩珊生前曾和圈中多位藝人合作。
今日羅蘭得知歐陽佩珊離世消息,回覆《蘋果》道:「好耐冇見佩珊,我哋都合作過好多劇集,記得佢飾演過我個女,印象中,佢係一個好好嘅人,對工作好認真,知道佢自從離開電視圈之後,曾經搵過佢做梅花針針腳。我覺得好可惜、好突然。」
魯振順稱:「覺得件事好突然,啱啱先知道。我知道佢有氣功牌,身體都係好強健,不過我哋好耐冇見,最近見佩珊都係因為鋒哥嘅關係,因為自己身體唔係好妥,當時鋒哥同我講佢哋有強勁嘅氣功,可以去學下,於是我就跟咗佩珊學氣功,教我要配合調節呼吸。
「上堂都好嚴謹,我真係唔相信一個咁強勁嘅氣功師會有咁嘅結果,我知道佢作息好定時,我亦都知道佢對鋒哥好嚴謹,不過佢都係尊重鋒哥啫,我覺得大家都要惜緣、惜福、感恩,大家唔會勾心鬥角。」
曾經於麗的電視與歐陽佩珊的黃淑儀謂:「聽到覺得毛管戙,同對方好耐冇見,覺得好婉惜,知道佢一向都好低調,我哋以前喺麗的電視嘅時候,都已經有合作,後來再嚟無綫嘅時候,佢就退出咗喇。」