心情動態:
來自水泉澳邨 |
分享我2018年度入手嘅電器産品
聲明:此帖純為分享,並非炫耀或推介,敬請留意,不喜勿插。
前言 買一樣電器產品,都係為咗提升生活質素,如舒適、方便、省時、享受等等,但入手前要留意三個重點 重點: 1.財政 2.需求 3.環境 1.財政)買乜嘢都要用錢,所以決定買之前要衡量會唔會影响自身及家庭嘅財政,亦要貨比三家格吓價免做水魚俾人劏。 2.需求)即係需要及要求,舉例如電飯煲基本上每個家庭必備,平至兩三百,貴至幾千甚至過萬,買邊款就要睇你嘅財政同要求。 3.環境)環境即係你間屋嘅格局,入手之前要量度返究竟安唔安裝到或放唔放得落,舉例如分體冷氣機要度清窗台大細先好買,電視機亦要因應距離買寸數。 以下為本人2018年度入手嘅電器產品,附加個人主觀及理性嘅分析 影音系 TH50EX750H 50寸4K3DLED電視 擺放位置:主人房床尾掛牆 評價:此機為2017年款,亦可能係P記最後一代帶3D功能嘅電視,所以入手,而床頭至床米約有兩米距離,呢個尺寸都幾fit,睇電影一流。 SC-HTB250 Sound Bar 擺放位置:主人房床尾層板 評價:此Sound Bar為120W(RMS)輸出及配置無線重低音揚聲器,臨埸感十足,配合電視後簡直尤如置身電影院嘅感覺,我同屋企人今年都冇入過場睇戲咯! SC-UX100 微型音響組合 擺放位置:主人房床尾層板 評價:我個人都幾鍾意聽歌,呢部有300W(RMS)超大功率輸出,爆歌一流!好在暫時未有鄰居投訴! SC-HTB200 Sound Bar 擺放位置:客廳電視機下 評價:80W(RMS)輸出,增加客廳睇電視嘅臨場感。 入廚系 SR-SPX183 IH蒸氣磁應西施電飯煲 擺放位置:廚房台面 評價:入伙後一路用開韓國品牌嘅IH氣壓飯煲,而P記呢個飯煲我都心儀已久,財政許可下終於入手,唔係吹水,煮出嚟嘅飯的確比其他飯煲鬆軟濕潤,而多得佢有一個獨立嘅儲水容器,保溫或加熱會從容器取水化作蒸氣加熱,所以唔會似一般飯煲保温或加熱係用煲內嘅水份令到啲飯會乾“爭爭”,當然值唔值就各人意見啦,另外佢行1400W,正常模式用48分鐘煮一次飯,計落煮一次飯要用成1.1度電!比起我個迷你飯煲250W只用15分鐘煮一次飯用多成18倍電!!! RSC-B18R 多層蒸煮美食鍋 擺放位置:上廚櫃內 評價:有咗呢個有兩層蒸架嘅鍋就可以實現响屋企整蒸氣邊爐,唔使吓吓出街先食到!不過略賺鍋身細咗啲,但如我一家三口嘅都夠用,另外亦可蒸吓啲急凍點心或包類,幾好用。 RSS-B351CG 陶瓷蒸燉湯煲 擺放位置:上廚櫃內 評價:全自動蒸燉唔使睇火,慳唔小功夫,除咗有個大燉盅燉湯另外亦配置四個小燉盅可燉吓木瓜雪耳糖水等等,唔錯。 RSB-B1CV 迷你蒸煮盒 擺放位置:上廚櫃內 評價:有人話蒸飯最健康,所以入手一隻間唔中健康吓,另外亦配置咗個不銹鋼芝士鍋,不過我都唔食芝士鍋,聊勝於無啦。 RSB-B2TW 迷你雙層蒸煮盒 擺放位置:上廚櫃內 評價:出完單層話咁快又出雙層!抵唔住頸要佢一家團聚! RRC-JG05 迷你飯煲 擺放位置:上廚櫃內 評價:飯煲我多的是,呢隻今年新款,個樣幾靚仔,入手一隻備用或送禮。 通風系 RFC-8KW 循環扇 擺放位置:客廳電視櫃台面 評價:機身細細放得到我電視櫃台面,行DC摩打夠靜,90°搖擺夠廣闊,風向亦能自動吹上至天花板,打散客廳冷氣一流。 RLF-20KV 優美扇 擺放位置:女兒房 評價:底盤夠細唔太佔位,行DC摩打夠靜,風力亦夠勁,仲附有逆向風功能,不俗。 照明系 HH-LT0220 LED枱燈 擺放位置:主人房梳妝枱上 評價:光暗及角度均可調節,另用USB沖電一次可用八小時,可靈活擺位。 另外我上年亦分享過我屋企嘅用電產品,有人話使唔使咁多呀!有好多重覆呀!有冇咁多位置擺放呀!但我可以回答我買得到就放得落,因為我都係奉行上文中嘅三個重點,本身我入伙裝修前已作好詳細嘅規劃,屋企唔會凌亂迫夾。講到尾我都係為自己及家人過得方便舒適,廚房基本上想整乜就整到乜,風扇唔使搬來搬去,電視唔使下下出廳睇,算唔算奢侈就見人見智,更新後多出嘅電器亦會轉贈親友,亦因我現職某大電器代理公司,買嘢有折所以我2018年度入手嘅電器如果用出面唔打折買要兩萬八千幾,我就萬五都唔使就全部入手。 我上年嘅帖 http://cyclub.happyhongkong.com/viewthread.php?tid=176842 |
水泉澳邨嘅邨民
歡迎參觀我的家 https://cyclub.happyhongkong.com/viewthread.php?tid=162953
|
|