利申：本人用緊電磁爐
前言：一個正常家庭都會响屋企煮食，咁當然要有煮食爐，除電陶爐外（呢種爐因用爐面發熱相當嘥電費事講）通常會用電磁爐或燃氣爐（包括煤氣或石油氣），咁究竟選用邊種會好啲？以下為個人分析

煮食原理
電磁爐：利用電磁感應加熱使煮食器皿發熱
燃氣爐：利用周邊空氣及燃氣產生火焰加熱煮食器皿

煮食時室温及油煙比較
電磁爐用磁應加熱，熱力只由鍋具產生，故此週邊之温度變化不大及油煙亦較小
燃氣爐用明火加熱，故此週邊之温度大幅上升及油烟亦較多

安全性比較
電磁爐需接駁獨立電源插座（當然要符合A數，一般2800W用返13A插座就得）對通風冇特别要求，有煮食時間掣
燃氣爐需接駁燃氣喉管（爐身及燃氣喉管要定期檢查及維修）明火燒氧一定要有良好通風，冇時間掣要睇火

清潔比較
電磁爐為平面設計，通常一抺就攪掂
燃氣爐要清潔爐圈及燃氣位

使用注意
電磁爐通常為玻璃面，不能大力撞擊，否則有爆玻璃之危險，亦因為係電器關係所以忌水，怕比水浸
燃氣爐需注意出氣及出火位有冇瘀塞

使用鍋具
電磁爐只能使用鐵底及平面之鍋具，局限性較大
燃氣爐基本上用任何鍋具都得

燃料費
電磁爐用電較平
燃氣爐用氣較貴

當然用邊種爐係閣下嘅選擇，對我一啲影响都冇，但我個人選擇用電磁爐原因為
1) 安全-打風落雨天氣凍閂細個窗嚟煮嘢都冇問題，室温亦唔高，亦冇漏氣或吹熄火嘅風險，唔用明火個女煮嘢食都放心啲
2) 方便-清潔一抺就掂，有時間掣唔使睇火
3) 慳錢-用電平過用氣

有人話用電磁爐鑊氣唔夠唔好食，我嘅見解係「在家食健康，出外食風味」，响屋企煮應以健康行先，俾你拋到鑊或成個鑊着晒火咁又點？多油煙得嚟又唔健康，煮同抺嗰個都辛苦啦！屋企整吓家常菜，出外先食鑊氣嘢先至係正道。

留意開孔尺寸

回應 #48 yauyee25

不過我用電陶爐，煲湯穩定d, 晤會時細時大?