check in嘅係一隻識講英文嘅速龍。
朋友喺日本返嚟,話入住間酒店職員「冷冰冰」。日本service出名好,點解會咁。原來,佢喺長崎縣住嘅係全球首間機械人酒店。
酒店喺佐世保市主題公園「豪斯登堡」,the Henn-na Hotel,Henn-na日文係変な,意思係「騎尼、古怪」。朋友話入到去真係好古怪,同你check in嘅竟然係一隻識講英文嘅速龍,個樣都幾嚇人。如果識日文好啲,因為美少女機械人係講日文嘅。不過,朋友話大部分資料都係自己填㗎,機械人只係問簡單問題,似乎係噱頭嘢。
之後個機械人就堅啲,因為雖然肥肥矮矮(基本上只係一舊嘢),但毫不費力咁將大件行李搬上房。有時去旅行,見到酒店職員係叔叔,仲要幫你搬嘢,會唔好意思。機械人搬就冇罪惡感。(費清估呢批機械人未進步度有AI感情啩?)
朋友話電腦喺大堂已紀錄低客人面貌,當你去到房門,門口器材有面容辨識功能,認得你個樣會開門。不過朋友為咗私隱唔想畀酒店紀錄自己個樣,就要求用感應門卡。
酒店咪好貴?又唔係喎,費清上官網(
http://www.h-n-h.jp/)睇過,一間雙人房最平9000日元咋,即係五百幾蚊港幣。可能因為機械人取代人手,減低咗成本,而且酒店都好環保㗎,例如連雪櫃都冇。