http://hk.apple.nextmedia.com/fi...21064780.1450142486
今年初新居屋發售，本報原本邀請中籤者參加真人show，回覆千奇百怪，有遠自澳洲港人聲言抽中，又有中籤者約好做第一集，
臨尾屋企人反對而放棄。

節目原本擱置，直至5月底，本報收到這個電郵：

本人Tony Yuen
29歲男性自僱人士
20歲立下30歲前業主夢
辛辛苦苦已儲到450萬樓下樓的2成首期
但由於係自僱申請按揭甚難（想做九成按揭）
希望能夠得到幫助完30歲前上車夢

結果，居屋真人show，即時變成今日登場的《80後上車真人Show》！

Tony今年29歲，自僱司機，月入超過3萬元，不過呢份工……「通常我朝早8點出門口，做到下午3點零鐘，一日做七個零鐘，無假放㗎！自僱，多勞多得，放假咪無錢囉！你要勤力，就要日日做……一年有一日假，就是大年初一，病呀、整親，都要硬住頭皮上……」之前做保險，同上司不咬弦，轉行做自僱司機，做了近兩年，幫三間公司日日送貨，「家陣收入算穩定，好彩有啲公司照住小弟。」

幾年來返工又返工，儲錢又儲錢，「身邊好多朋友30歲前已經有幾層樓」，朋輩壓力，激起他要30歲前上車，家陣儲夠首期近100萬元！「我比較鐘意做人前嘅嘢，即係我希望喺大家，譬如一齊畢業或同年紀嘅人，希望自己跑前少少，即係唔想做後面嗰班。」

Tony租住西貢村屋，夢想居所是將軍澳寶盈花園，「由細到大住將軍澳，舅父一家住寶盈花園，細細個就係佢地湊大我，我最希望住喺佢隔籬。」計過度過，雖然儲錢近百萬，但想留啲錢傍身，預算可以買到450萬元以下嘅樓，目標是借九成按揭，首期約四、五十萬元，月供1.3萬元、1.4萬元，唔會太辛苦。

記者請來多位專家，為Tony上車作好準備。

玄學家麥玲玲睇過Tony八字，「Tony呢兩年有置業運，今年乙末年，幾明顯見到家宅運強，相信會買到樓。但需要貴人幫忙，要人幫手，就算諗住做都差少少，不過最終會成功。邊啲月份最容易呢？係中秋節前後，機會較高。」Tony命中需要金和水，買樓最好在西方或北方的地區，單位最好見水。

不過Tony好想買將軍澳樓，玲玲師傅就話，將軍澳屬東區，東區唔係認真旺佢，不過硬要在將軍澳買樓，可以揀啲樓盤望到水，或者樓盤名有三點水，叫做平衡返少少。區份來講，始終西區、北區有利於佢。真係揀唔到，門口向西或向北，室內顏色米、白、淺藍色，外望有水，呢啲屋一定旺佢。不過玲玲師傅補充：「佢今年置業運係高，不過今年行嘅運係需要貴人幫忙，買嘅過程需要有人幫手先得。」

究竟Tony能否夢想成真？欲知後事如何，請收看《80後上車真人SHOW》第二集。

【上車真人show2】衝動入市無按揭　40萬瀕撻定
http://hk.apple.nextmedia.com/fi...21064780.1450142486
上集講到，做自僱司機的Tony，月入超過3萬元，首期儲近100萬元，可惜無稅單。中原按揭經紀董事總經理王美鳳建議，「以佢嘅情況，可以考慮450萬元以下嘅單位，樓價450萬元係做唔到九成按揭，最高八成，佢入息同首期方面，買入一個450萬樓下嘅樓比較適合，但要留意，有固定收入申請人先至可以得到按揭審批，如果屬於自僱人士，到時銀行未必可以批出，如果擔心，可以喺銀行做預批，會穩陣啲。」

5月至6月期間，二手市場極度缺盤，好似傳統上車屋苑沙田第一城，伙數達10,643伙，在6月份，一度低見5個「鎖匙盤」，九龍灣淘大花園鎖匙盤亦僅4至5個。他心儀的將軍澳更加缺乏適合他的放盤，中原地產柯勇表示：「唔好話400幾萬，喺500萬元以下嘅樓盤都好少，私樓直頭係無。」

盤少價硬，Tony想搵個啱價放盤睇下都無，搵完又搵，等了又等，換來一個又一個無啱盤的回應。直到7月至8月期間，有了轉機，股災震盪，鎖匙盤陸續浮現，終於有返啲鎖匙盤俾Tony去睇下，是鄰近港鐵寶琳站的將軍澳居屋浩明苑，屬單幢樓，一個實用483方呎單位，叫價488萬元。

不過Tony都是抱住睇下的心態，「佢價錢唔平啦！488萬，期望係450萬元樓下嘅樓，而且希望係啲大型少少嘅屋苑，始終單幢樓，同埋超budget，所以都係睇下先。」佢覺得唔需要急，「買樓呢啲嘢可以從詳計議，睇多幾間都無壞。」

睇完單位，經紀一行開，他彈三彈四，「一定要執過啦！」、「廁所唔得，太細、太逼」、「價錢貴少少，始終唔係私人樓」，問他會否拍版買呢個單位？他答，暫時唔會。

第一次睇樓後，他說：「我個人係特別啲，有陣時好想要一樣嘢，就好心急去做，唔理三七廿一，就要做到嫁啦！但係有時，攝高枕頭，瞓多幾晚，諗下諗下都唔使咁急，慢慢來，總有機會買到。」

口說不，身體卻很誠實，隔幾日，代理推銷他將軍澳居屋康盛花園一個兩房單位，補地價叫價390萬元，當時來講，勁平！事關同區四球以下放盤絕無僅有，但係……《80後上車真人SHOW》第二集繼續話你知。

社會可俾…以佢甘勤力應該買到2層樓

抵佢发达，
人生并不是只有砖头，
还有很多东西，例如龙虾，鲍鱼，旅行，
健康，快乐，生活在无压之下，真是优哉悠哉，
何必硬要做楼奴呢？本帖最後由 lomeion 於 2015-12-16 07:56:16 編輯

上車真人SHOW最終回！
80後Tony結局揭盅

http://hk.apple.nextmedia.com/fi ... 78354787.1450227725

當初衰衝動，無做按揭預批就去買樓的Tony，驚過、喊過，又冇屋企人肯幫手，唔服輸嘅佢冷靜反思，雖然8月27日落大定，距離11月19日收樓上會日，介有兩個幾月時間。佢搵咗好多間銀行，都係叫佢搵擔保，出稅單。一張稅單，足以將佢由輸近半球，變成達成夢想做「真．業主」。佢預計9月尾、10月頭，應該可以有稅單，「點知一路上網CHECK又好，打電話去問又好，都話未出到稅單……

以為輸硬，做事堅持的佢打電話去稅局，「可唔可以快啲出到稅單比我，因為出唔到，我呢度（康盛花園）就撻訂撻40幾萬，好大鑊㗎啦！稅務局個主任都好好，佢話好啦，你呢個私人原因，都盡量幫你盡快搞掂啦！」11月19日收樓，到10月31日，佢通知攝製隊「搞掂」，最終銀行批8成按揭，「搞掂果一刻，果下真係鬆嘅！」

經過三個月煎熬，終於達成30歲前做業主的夢想，入屋前百感交集，「人生太多呢啲咁嘅崎嶇路途，日日都有咁嘅不如意事，咁始終都要過。」入到屋，他好興奮四圍走，「唉，真係終於搞掂啦，但係又無話特別開心，終於唔使擔心呢樣，擔心嗰樣。」

不過收樓後先發現，單位有好多地方要執。佢話，睇樓當日，望到地磚新，裝修好曬鋁窗又新，覺得裝修好好，點知拎走晒啲傢俬，牆身天花都好殘舊。主人房牆身更加發現漏水，兼有個蟻竇。

第二日，我哋搵裝修師傅黎先生幫他睇單位，尤其是主人房牆身靠近浴室係咪漏水，「試過水，暫時睇唔到滲漏」，不過主人房冷氣機位附近牆身起泡，相信要重新批盪。

歷時近8個月，樓價已下調。當日Tony買入單位，實用495方呎，買入價382萬元，呎價7,717元。康盛花園交投疏落，6月、7月及8月分別錄1宗、4宗及2宗成交，成交價由400萬元至480萬元不等，呎價介乎6,791元至8,889元。比較最新成交價，佢嘅買入價仍係近半年最低。但以呎價而言，比較6月份該宗呎價最平單位，為2座低層B室，實用589方呎，成交價400萬元，呎價6,791元，Tony買入的單位呎價則高約13.6%。

對於第一次入市，撞正樓市下調，佢話：「唔通話嘢嘢都低買高賣咩，咁你咪係神？係唔係先？你玩晒啦！樓市總有高低，喺你合適嘅時候，有能力嘅時候咪做。買樓目標完成咗，對我來講係過去，唔需要再為呢層樓，覺得開心死，下一個目標是三年內買第二層樓。」

記者︰陳家雄 吳美茸
攝影︰張柏基 楊柏賢 何柏佳 鍾偉德 黃耀興 朱家駿
剪片：RAY本帖最後由 folee2008 於 2015-12-16 09:46:26 編輯

【上車真人Show3】
死慳死抵變宅男　月使二千為層樓

http://hk.apple.nextmedia.com/fi...78354787.1450227725

Tony樓就買咗，點知大禍臨頭。上集講到佢係自僱人士，稅單未有，買樓前諗住做按揭預批，首次睇樓仲話要慢慢嚟，最終衰衝動，落「大定」40萬元買入將軍澳居屋康盛花園一個兩房單位，家陣做唔到按揭，隨時撻定輸半球，呢筆錢其實儲得好辛苦㗎！

佢冇大學畢業，中學畢業後投身社會後，做過Sales、文員、清潔、侍應、廚房、外賣仔、電單車速遞、接待員，對上一份工係賣保險，但同上司不啱咀形，不歡而散。因緣際遇，朋友叫買車，買買下變咗做自僱司機，家陣幫3間公司日日送貨。

社會大學起步並不如意，近幾年轉做司機，收入先稍為穩定，5年前開始儲錢，目標一年儲36萬元。「我覺得人生一定要有車有樓！由細到大，好想要嗰樣嘢，就會定做目標，未必一定得，而且當中好多唔成功。」為達成30歲前置業的夢想，「搵份人工高嘅工，跟住儲錢或者投資，唔好攞去玩，唔好攞去旅行。」

唔係打政府工、又冇大公司大樹遮陰，自己幫自己打工，飯碗隨時不保。佢好清楚這種情況，所以唔敢大花筒，平日死慳死抵，「早餐唔食，一瞓醒就撲出去返工，通常做到晏晝，公司包飯嘅，咁就食公司飯，有陣時喺公司拎埋晚飯返屋企食……拖又唔係點拍，又無乜朋友，又好少應酬食飯，興趣又唔多大。每月消費2,000至3,000蚊……無乜朋友無辦法，掛住做嘢……少啲娛樂咪少啲消費，真係要捱㗎，成個宅男。」

兩年前唔同父母住，同朋友夾錢租西貢好偏僻的村屋，每月交租約3,000元，屋內家具好多二手，甚至免費，好似衣櫃，睇落兩三千蚊貨仔，但原來只係幾百蚊。就連著緊嘅衫都只不過係喺淘寶大量買入，幾十蚊貨色。

無社交、無嗜好、低消費、計到盡，朋友都話佢係孤寒鬼，最終佢真是儲到近百萬蚊首期。慘在當日衰沖動，無稅單，屬自僱人士，銀行唔批按揭，專家叫他搵擔保人，大難臨頭，梗搵親人。點知阿爸阿媽經濟能力有限，做唔到擔保，想家姐出手？「家姐同姐夫，經濟能力好好，（但有無擔保到？）佢哋有自己諗法，咁又唔會怪佢，始終擔保係大事，咁唔擔保都好正常，不過如果調轉係家姐有事，我一定會幫。」

屋企人幫唔到，佢都未絕望，心諗報咗稅，9月尾、10月頭會有稅單，點知10月遲遲收唔到稅單，「上網查又好，打電話去問又好，都話未出到稅單」。距離收樓只剩兩星期，唔通Tony第一次上車，就要撻定蝕錢喊住走？

記者︰陳家雄吳美茸
攝影︰張柏基楊柏賢何柏佳鍾偉德黃耀興朱家駿
剪片：技安