港姐出身嘅無綫新咪神朱智賢（Ashley），今年4月喺Ig爆seed，話俾自己阿哥施虐，仲講到係家門不幸，決定要搬離屋企暫避。

原以為唔開心嘅嘢已經過去，點知噚日朱智賢又喺facebook貼文，劈頭第一句仲話「唔好意思，烈女又要爆seed!!」

發生乜嘢事？佢噚日喺朱智賢寫咗篇長文，斥一個上門幫狗狗清牙石嘅寵物美容師不負責任，令佢嬲爆嘅係對方竟然將佢嘅電話喺網上公開，又間接公開佢嘅地址。

原來朱智賢上星期約咗該名美容師上門，幫狗狗清牙石。朱智賢聲稱，本身約咗3點，但對方突然話要4至5點先到；但對方之後又改6點。點知到近6點，對方突然話要同一隻貓沖完涼先過嚟，叫朱智賢等多個幾鐘，最後佢決定唔等，改期叫對方噚日中午12點再嚟。但故事當然未完。

朱智賢怒轟：「改期嘅時候，我已經講到明，今日(即噚日)中午12點，唔可以遲，因為我之後要開工，佢話OK！然後噚晚(即前晚)我專登問多次係咪12點，佢又答我係！到咗今日，又係有佢嘅原因而要遲嚟，今次要等工人姐姐，所以我又喺屋企等咗佢個幾鐘，然後我決定放棄。

「因為呢個人太冇責任感，守時係生意上最基本嘅都做唔到，三番四次咁要客人等你，係乜嘢服務？我打咁大篇嘢都係想大家小心啲。一個咁冇責任感嘅人，如果佢幫你哋啲寵物沖涼剪毛清牙石，發生乜嘢事佢一定唔會負責。同埋佢份人咁冇責任感，做事真係會好嘛？又或者你係好得閒可以坐喺屋企一日等佢嘅話都可以試下。」

據知，Ashley本來都唔知道電話俾人公開咗，直至有一個陌生女仔whatsapp佢，提醒佢俾呢個美容師公開咗電話，同埋登咗google map出嚟，間接公開咗佢地址，佢先至即刻揾嗰個美容師，叫佢即刻delete，但對方都依然冇道歉，只係話按錯咗。Ashley今日接受傳媒訪問，講到被公開個人資料，佢話：「我問咗朋友意見，諗住會報警處理，因為間接有埋我地址，覺得係好大件事！」

朱智賢在fb怒爆一間上門寵物美容服務公司不守信諾，明明約好時間但無限delay，理由多多。此po一出，不少網民留言聲稱亦是該公司的苦主，有網民稱：「我足足請咗兩日假，等足佢兩日，飛機我，真係好過份，自己唔啱仲開po罵人，公開你地址。」

原來朱智賢爆seed嗰間上門寵物美容服務公司，噚日喺朱智賢出po後約三小時左右，就喺佢個官方fb亦寫咗篇長文反擊，仲出圖。不過，此po已刪。

呢位聲稱曾於東京深造畢業，擁十多年以上寵物美容經驗及多項寵物美容證書，獲獎無數嘅美容師，於回應post裡面反指係朱智賢唔啱。

1.先為遲到致歉
「其實我所有嘢都有預先話佢知，不過我遲到的確有唔著嘅……」

2.指朱智賢記錯時間
「第一日，我話四至五點嘅時候原來人哋以為係改嘅。咁係我行為有疏忽嘅。」

3.解釋點解Miss call同遲到
「到第二日，我又掛住整狗，又唔記得咗睇電話，話俾人聽，都係我唔啱嘅。我要delate(delay)到接近四點先話俾人聽。因為日日排嘅貓貓狗狗都好密，動物又會識郁，我又唔會夾硬嚟，整得唔好又唔會交俾人…同揸車又會塞車，所以真係好多時候預時間好難。但整緊嗰刻又太專心，成日遲咗覆。」

4.指朱智賢明知大雨急call
「我今日(即噚日)有突發嘢，要等工人姐姐，所以都提前話佢(朱智賢)知…都解釋了、不過到咗1點零幾分嘅時候，姐姐(即朱)打嚟話限我十分鐘內到。當時都好大雨，條路都好難睇，而我真係唔熟嗰邊嘅路，又揸緊車，都好難再講得太多。我都答我都係唔係咁熟路，所以…都應該可以嘅，我喺公路上面了。」

5.「佢話我呃佢」
該美容師續稱，自己仲爭一個燈位就到，但朱智賢突然話唔要service：「佢話我呃佢，而佢話冇需要，我都冇再轉入到，所到去前啲停得車嘅位置，我只share我當前嘅位置俾佢，當然，我到最後都發咗msg俾佢，同佢講唔好意思。」

6.
最後呢位美容師以多個hashtag為自己叫屈：
#人哋話一句對唔住都冇所以後生女唔休做
#係咁唔好意思都唔憂做就只可以講嘢可以講
#遲到就等同乜都唔負責咁就有啲(emoji)
#不過有句又講得好啱，唔等真係唔好搵我，唔氣好勞氣㗎
#知我者都係我啲客，下次我接新客小心d
#做零售業做錯少少就係咁俾人公審啦

前港姐兼新咪神朱智賢前日約咗上門美容服務為狗狗洗牙石，朱智賢嘅版本係美容師不斷改期，本身約咗3點，但突然話要4至5點先到；但對方之後又改6點。點知到近6點又突然話嚟唔到；改翌日又遲到，朱智賢盛怒之下取消booking；美容師嘅回應版本就係先承認自己聽唔到電話係錯，但否認講大話，又指：「不過有句又講得好啱，唔等真係唔好搵我，唔氣好勞氣㗎！」雙方在fb出post互相指摘。

美容師更稱，「做零售業做錯少少就係咁俾人公審啦」，但其實對方在fb出post時，還貼了與朱智賢的WhatsApp對話截圖，洩露了朱智賢的電話及地址。

寫咗篇長文，斥一個上門幫狗狗清牙石嘅寵物美容師不負責任，令佢嬲爆嘅係對方竟然將佢嘅電話喺網上公開，又間接公開佢嘅地址，朱智賢一直不知，直至收到一個陌生女孩WhatsApp她，提醒其私隱公開，朱智賢始恍然大悟。

事後朱智賢即刻搵嗰個美容師，叫佢即刻delete，但對方都依然冇道歉，只係話按錯咗。

今日朱智賢接受傳媒訪問，講到被公開個人資料，她稱：「我問咗朋友意見，諗住會報警處理，因為間接有埋我地址，覺得係好大件事！」

寵物美容師在fb貼出與朱智賢對話cap圖，將朱的電話及Google Map地址亦一齊公開。雖然此post已刪，但仍有網民cap咗圖。

不少狗奴貓奴都會定期安排寵物去美容，除了帶到寵物店，依家有好多美容師都提供上門服務，就好似朱智賢呢個case咁，其實佢今次幫襯呢間上門嘅寵物美容師，係靠朋友介紹，結果各執一詞，仲搞到朱智賢電話同地址都被公開。

所以，選擇美容師之前，一定要小心，尤其以私營、無牌方式經營嘅美容師，最好經熟朋友介紹，或者多點了解該美容師的背景同口碑，保障愛寵安全。如果選擇上門式服務，主人亦最好在場，全程監看整個美容過程。