提起江碧蕙，一諗到嘅必定係香港首個華人女騎師，喺策騎生涯中，贏過唔少頭馬，見盡都係佢風光嘅一面，但佢嘅前半生（佢今年只得40歲咋！），其實唔係真係咁一帆風順。http://video.appledaily.com.hk/mcp/encode/2017/08/07/3412074/20170806_ent_223_240p.mp4

出身於富裕之家嘅江碧蕙，喺5年前接受《蘋果》訪問時透露自己唔鍾意讀書，但一個機會，改變一生：「中三嗰年，遇正馬會招聘首屆女騎師學員，嗰時受訓有宿舍，我又鍾意騎馬，就膽粗粗試吓！媽咪唔贊成，好在公公幫口，我先得償所願。」佢又坦言因為細細個就跟住馬會會員爸爸去雙魚河騎馬，令佢佔優：「一星期三堂，學策騎同跳欄，嗰時好多報名受訓嘅學員，根本連馬都未見過，我識得騎，自然佔優，最後成功獲得取錄。」

做慣上等人嘅江碧蕙，受訓不久，爸爸間印刷廠被合股嘅叔叔鳩佔鵲巢，江爸爸被踢出局，更被勒令破產，令身為大女嘅江碧蕙更加唔衰得，加倍落力，決定要做出成績。千金小姐一夜間被迫長大，日夜操練，終於1993年12月29日首度策騎「玉璽」出賽，到1995年，更喺策騎「大瀑布」時首次贏得頭馬，於馬圈中闖出頭。

不過，喺成功背後，江碧蕙付出唔少代價，除咗汗水，仲有健康，佢坦承：「騎馬係高危運動，短短數載騎馬生涯，數不清由馬背掉下多少次。」更甚嘅係，江碧蕙喺1998年，亦即嫁畀李格力嘅第二年，證實患上腎組織病變，要服用類固醇藥物控制病情，令其騎師生涯告終；另一方面，心急做媽咪嘅佢亦被宣佈唔可以自然懷孕，令佢更怨。

江碧蕙承認自己一度抑鬱，幸獲老公陪伴走過最艱難嘅日子，而江碧蕙亦正面面對疾病，決定活在當下。江碧蕙以人工受孕方法，用咗3年、試到第9次先成功誕下大仔李國銘（Samuel），3年後一次意外下，自然懷孕，生埋細仔李國寶（Anthony），江碧蕙雖然退下騎師身分，變成居法嘅師奶，但佢受訪時，話自己樂在其中：「因為呢一切，得來不易。」

儘管江碧蕙同李格力嘅婚姻最後還是觸礁，舊年離婚收場，但佢再遇上第二春，今年3月嫁俾混血網球教練Jerome Lacorte。至於江碧蕙嘅騎師生涯，雖然亦無奈畫上句號，但佢近年重執馬鞭，轉為教騎馬，仲可以將佢嘅經驗同騎馬嘅熱誠宣揚開去。

（資料圖片）

00年嘅江碧蕙，仲係好青澀。（資料圖片）(蘋果日報)

江碧蕙自小已有騎馬經驗，故順利成為受訓騎師。

江碧蕙（左）、鍾麗芳（資料圖片）(蘋果日報)

03年，江碧蕙同時任香港旅遊大使嘅郭富城喺沙田馬場為香港隊參賽馬匹打氣。

江碧蕙係當年極少數嘅女騎師，自然受注目。（資料圖片）(蘋果日報)

江碧蕙要做騎師，被母親（右）反對，幸最後獲外公幫口先成事。

卸下騎師服，江碧蕙話自己喺法國，只係一個小師奶。（資料圖片）(蘋果日報)

江碧蕙早年執教鞭，教人騎馬。