臨時演員電視城慘遭白眼　判頭：保安當我哋賤民
城巴為電視城主要交通工具，但臨時演員不得和藝員、職員、記者等一同排隊，要排在另一邊，等其他人上哂車先可以上。
TVB臨時演員其實真的比《喜劇之王》尹天仇更辛苦，除了要著超臭衫，人工低，最慘是被白眼，電視城保安，對臨時演員定下不少苛刻條件，非常之不合理，例如坐廠巴便是其中一個例子。但先要大家理解入電視城方法，事閞電視城地點位於將軍澳工業邨，相當隔涉，大部份職員、藝員、或者要入電視城工作的人，通常會於將軍澳地鐵站，坐無綫提供的城巴，（入面稱為廠巴），大部份臨時演員，亦當然會選擇坐城巴入城，而離開電視城大部份人亦是靠城巴，因為既方便又快捷而且免費。


放工時間，藝員職員排隊上城巴離開，臨時演員想上車，真的難過登天。
排隊搭車天經地義，藝員、職員、記者或其他入城的人，都可以排隊上車，但這條隊臨時演員不可以排，只可以排另一條隊，臨時演員判頭阿強（化名）說：「條例係TVB保安定，我哋都唔知點解，我哋唔可以排大隊，有條叫臨時演員專用，專用意思係最遲上車，當所有人上哂，我哋有位先可以上，放工時間基本上我哋上唔到車走，（係咪你地太多人？）唔係！即使我哋得一個人，都唔可以排大隊，有啲保安玩嘢，就算我哋得幾個都唔放俾我哋同人一齊排隊，我哋唔係成身臭汗喎？點解要咁樣歧視我哋先？但有啲熟咗嘅，都會側側膊放我哋上去。」

尹天仇被劇務鬧，但無綫臨時演員更要被保安當犯看待。

而TVB保安對臨時演員好似仇人一樣，不時刁難臨時演員，阿強說：「佢哋覺得自己係差人，我哋係犯，賤民，好多年前出嗰張通告，俾我哋臨時演員公司，其實係一張地圖，叫我哋只能行通過邊一到，規定我哋行邊去邊，冇事就只可以返休息室，嗰休息室係兩個貨櫃嚟，好彩都有冷氣，但有時幾十人困喺到又著臭衫，根本上好難頂，如果我哋被保安投訴，好多時都會被停通告，冇工開，同埋我哋喺check point2（側門閘口）入，唔可以喺check point 1（正門噴水池位置）入，連送貨嗰個都可以，但我哋都唔得囉，驚我哋影響image啩？」

臨時演員要做埋搬運　判頭無奈：我哋平過咕哩

上篇提到TVB臨時演員，要著超臭戲服開工，辛苦錢絕對不易賺，最重要是錢不多，未實施最低工資時，TVB臨時演員日薪180蚊，甚至100蚊１０小時工作，但立法後，臨時演員時薪為34.5，原本法例是保障了他們，因為劇組以往一落單就９小時，照新例實施後，每位臨時演員日薪180蚊升到310.5蚊，但其實現在大部份劇組落單，只會用６小時，亦即是207蚊。

TVB臨時演員行外判制度，所以就算實行了最低工資，他們都沒有受惠。

判頭阿強（化名）說：「6個鐘唔包食飯嗰個㗎，劇組放飯嗰個鐘，冇錢，但我哋俾飯盒，多數叉燒飯，有時雙拼，仲有凍嘅汽水，呢方面無綫叫好好，再津貼15蚊，好人啲嘅公司就20蚊囉。加班有冇補水，有呀！咪照計囉，繼續最低工資34.5。」飯鐘不計錢，聽落有點沒人性，但其實判頭亦不想當衰人，但因為無綫只給判頭大約45蚊一個鐘，判頭只能賺10.5的差價為生，他說：「一個賺得10.5，無綫而家有幾可拍千軍萬馬？過百老臨？有人落張單book 10個呀，都要還神呀，我哋都想俾多啲班細，但我哋都要開公司、燈油火蠟，唔好話有冇肉食，為到皮都叫做好叻仔喇，所以越嚟越小人做，你做份保安都人工高過你，又舒服過你，你點揾人啫？以前好多新移民做，而家佢哋都識諗啦。」

臨時演員最愛開廠景，尤其是茶客，因為有冷氣，唔駛喺古裝街熱死。

而最令臨時演員判頭苦惱的就是保險問題，阿強說：「呢啲偏門邊有得買保險？有㗎，但我哋邊有錢買？開工，真係要自求多福，如果有同事受傷，都係我哋同佢哋拆，因為臨時演員係外判嘅，所以早幾年（2011年）我哋因為呢件事同無綫嘈過㗎，就係臨時演員保險問題，但當然傾唔掂啦。」而臨時演員還有一個價目表，就是跳海加幾錢？講對白幾錢等，他說：「講對白就當有戲做囉，嗰表寫明加半工，如果剩係鬧幾句「正衰人，奸商。」咁就唔收，真係有戲做，咪多20蚊囉，不過好多導演都肯俾嘅，因為佢哋都知我哋辛苦錢，有時我哋要幫手攞嘢添，舊時如果拍大壇嘢或者多道具，會特登book多幾個臨時幫手搬嘢，當咕哩用囉，都係照計時薪，再俾多少少，唔啱規矩㗎，但好聲好氣，真係冇所謂囉，我哋都係想快啲開工快啲收工啫。」