行內有句話叫「完美風暴」，指的是所有釀成風暴的因素都具備了，萬事俱備，災難必至。

人皆有錯，一點半點錯誤，未必足以致命。但你偏偏瓣瓣開，瓣瓣中，想點先，莫非就是想告訴大家你唔信邪？

九巴奪命車禍後，種種因素，激發部分員工罷駛，罷駛迅速解決了，但「忽然有效率」的資方管理層，竟然急不及待，神速向四名參與車長，送上大信封。

傍晚聞訊，各界譁然，一夜之間線上線下聲討不絶，政黨工會在九巴車廠連夜聲援，結果，巴士公司又於凌晨時份收回成命，暫時恢復四名車長僱員身份。

前後幾個小時，一場鬧劇。說是完美風暴或災難，並不為過，試看這個：

第一，衰心急。正如葉車長說，已有心理準備有人會秋後算賬，但誰都沒想過有這麽快，連原始起因的車禍尚且有那麼多事情未解決，資方竟然急於在秋後算賬上展現管理效率，如此漠視公眾情緒的決定，災難。

第二，炒魷過程聲帶流出，女聲OK，但那位男聲，唔知乜水，聽聲都知惡形惡相，唔係估唔到有可能被錄音吧，Mary不是鼓勵這種打破互信的行為，但出來代表資方就要有心理準備。

第三，不知是哪位天才作的決定，竟在昨天極度敏感時刻在FB貼埋啲語帶雙關漫畫，唔係以為扮下cute就可以化解災難吧？結果一日唔夠，嬲嬲豬直標萬八，佔了回應的九成半，嘩，災難到呢。

第四，就算再心急都好，3.11補選仲有幾日咋，真係唔等得，唔係以為建制工會夠膽在此關鍵時刻幫你呀？咁唔顧大局，砌個靚台俾泛民攞彩，林鄭多得你唔少。

諗極唔明，這種會為巴士公司及相關人物和機構形象帶來長久兼嚴重影響的舉措，有乜謂呢？

彭瑪莉

https://hk.finance.appledaily.com/finance/realtime/article/20180307/57916154