回應 #1 GGpark
屯門新屋邨老鼠多 葉劉叫「鼠王興」做嘢
香港嘅新屋邨經常被人批評規劃有問題,公共設施同交通配套嚴重不足,居民入伙後先發覺問題多多。議員葉劉淑儀今日(30日)去咗考察屯門嘅和田邨同菁田邨,發現呢兩條邨唔單止交通設施有問題,仲出現鼠患問題喎,佢仲話考慮叫有「鼠王興」之稱嘅政務司副司長卓永興去當地視察,諗下點樣可以幫居民清理鼠患。
話說葉劉同屯門區議員蘇嘉雯視察過呢兩條邨期間,蘇嘉雯向佢提起邨內嘅鼠患問題,話試過有老鼠沿喺平台一路爬去高樓層「闖入」民居。雖然之後房屋署嘗試「補鑊」,應承裝番個防鼠欄,但係葉劉都係唔「收貨」,追問點解唔可以早啲裝喎。
之後葉劉仲話菁田邨隔籬有一個私人墓地,依家變咗老鼠溫床,係構成屋邨鼠患嘅主因喎。佢解釋,因為嗰度嘅私人墓地園景布置相當密集,啲老鼠好容易就匿埋喺樹叢入面,令人難以發現鼠蹤,增加咗捉老鼠難度,而且墓地同屋邨相隔嘅老鼠網都好簡陋,隙縫闊到可以俾貓狗通過。佢話同房屋署嘅保安傾過,得知原來保安一早喺相關地帶放咗鼠餌,由於鼠患情況嚴重,所以作用就唔大。
唔單止鼠患,葉劉仲發現呢區嘅交通配套好有問題,屋邨嘅設計亦都都好「獨特」。因為菁田邨嘅樓梯竟然可以直上貼近民居嘅平台,沿路仲要無嘢阻隔或者保安,好似無掩雞籠咁。佢話咁樣不但滋擾民居,仲造成嚴重嘅治安隱患,批評屋邨設計師設計屋邨嘅時候,無諗到治安同民生配套呢啲實際需要。
佢覺得政府喺落手解決土地房屋問題之餘,仲要令市民住嘅時候獲得「幸福感」 。面對咁嚴重嘅鼠患同交通配套不足嘅問題,佢話要諗下「捉」卓永興落嚟,諗諗計幫居民清理鼠患,協調相關部門改善屋邨交通同設施等配套喎。