（按：今時今日訊息橫流，話題一攤凍，再講都悶，過去一周坊間亦有多篇關於蔡東豪的精彩文章。不過既然寫了上集，點都要有下集收尾）
上回講到，90後鬼仔健身教練Ryan想知如何嘆「東豪式軟飯」，叫佢首先要學蔡東豪圓滑的交際手腕，即是做世界仔。高級世界仔唔可以只停留喺「見人講人話」低層次級數，最重要是深諳「資訊不對稱」之道。
綜合與蔡生接觸過的人士就知，他在廠佬面前，就sell自己做過banker；在真正bankers面前就自居文化人；遇到政治界人士，就係上市公司CEO。隔行如隔山，這種手段很易令對方以為自己好勁，避免同行一眼看穿的尷尬。
蔡生有charisma，中環醒目仔想學未必學得來，斯文四眼靚仔look中環一街都係，但要好似蔡東豪咁玩埋毅行者，服喇，仲要形象夠正氣，有分加。亦因為咁，10年前他由商台「委身」加入二線工業股精電（710），令人嘖嘖稱奇，但睇番蔡先生CV，其實他有幾屈就？（全中環現在最屈就那個叫陳南祿，下回再寫。）
無錯蔡東豪是幫過李嘉誠打工，但僅是他旗下鼻屎咁細粒的加怡融資，就算在長建（1038）亦只係位及中層。佢無留低等升職，反而去間財技多多的中建電訊做執董，title大咗，但公司級數低咗。最叻仔一次是在商台做COO，坊間引用favour to蔡東豪的版本，指他離職是因為炒鄭大班與俞琤意見分歧。俞琤一方無乜風聲，究竟這是出於不講是非的高尚情操，抑或「膠都費事派」的氣派，這種沉默成為「東豪式軟飯」一塊硬骨。

何淑茵