|
頂級用戶
 
心情動態：
來自啟晴邨
|
2013-10-29 11:57:44
繁
简
粗
首先簡介少少背景, 同點解要搞呢次投票土木工程拓展署係10月28日對啟德輕軌鐵路搞左第2輪諮詢(http://www.ktd.gov.hk/efls/tc/index.htm), 當中公布左新的方案, 當中就建議取消啟晴站, 本人本身唔係任何政治團體, 只係想咁多位街坊可以關心社區發展, 團結大家意見同訴求, 再搵下地區幹事/區議員/立法會議員睇下可以點解處理今次事件, 亦都希望土木工程拓展署都可以落黎啟晴邨搞公眾諮詢, 聆聽居民意見
首先, 先講下個發展計劃
基本上土木工程拓展署一直提出個方案都包括啟晴站
(圖一為鐵路在啟晴, 德朗中間穿過官方模擬圖)
直至10月28日, 土木工程拓展署提出取消啟晴站的最新方案(圖2)
根據10月29日報章報導, 局方取消車站理由大概是大部分公屋範圍都在啟德站500米範圍內, 如果起啟晴站, 就會同港鐵有路線重疊
第2, 講下支持取消啟晴站的理據...
坦白講, 我諗唔到有咩理由要支持...
A.有街坊話佢唔起車站既話, 啟晴會靜D, 嫌輕軌鐵路阻住哂, 無左仲好...
但事實係就算唔起個車站, 條路軌一樣會係啟晴同德朗中間穿過, 局方只係取消車站, 無修改到路線, 變相令到啟晴德朗人有得睇無得食, 但又要捱佢工程時候既噪音同沙塵, 落成左之後亦可能會滋擾居民/影響景觀
B.亦有居民提出寧願要小巴/巴士, 都唔想要輕軌...
但事實上2者係唔會有衝突, 我明白大家都想有小巴/巴士去旺角/尖沙咀/中環/銅鑼灣呢D地方, 但輕軌鐵路只係區內線, 服務九龍灣,啟德, 觀塘, 所以區議會同運輸署唔會因為輕軌鐵路而增加/減少區外線....
相反, 反而會影響到區內線, 因為輕軌鐵路起好之後, 運輸署同區議會就會假設輕軌鐵路可以服務到啟德,九龍灣. 觀塘的居民, 到時區內線就會極少, 就好似屯門因為已經有輕鐵, 所以要係屯門區內活動9成都要靠輕鐵, 無咩其他交通工具的選擇, 到時, 當局就會假設居民可以行10分鐘去輕軌車站, 而唔會有任何其他路線去九龍灣,啟德, 觀塘
第3, 講下反對啟晴站的理據...
A. 前面都講過, 條路軌行得入黎啟晴朗德, 要居民捱噪音廢氣, 但又唔整個站畀居民, 咁係唔公義
B. 前面都講過, 將來啟德會有好多新設施, 例如運動場/都會公園, 將來啟德區內交通將會高度依靠輕軌鐵路(到時啟德大站分地方已經有輕軌鐵路, 運輸署唔會特登開條線畀你去運動場/都會公園), 咁到時大家要去啟德其他景點就要先行10分鐘, 再坐3分鐘車先到, 相反, 如果有左啟晴站, 大家坐5分鐘已經到了
C. 同啟德站相距500米亦不成理據, 例如麗晶花園站同啟祥道站只相距300-350米左右, 咁點解3百幾米都可以有個站, 而500米就唔可以呢?
D. 500米, 有時得閒,行下做下運動都OK既, 但如果落雨, 又或者拎住重野, 又或者公公婆婆/殘障人士, 有個站會方便D既
第4, 都係希望大家關心社區發展
希望地區幹事/區議員/立法會議員可以做下宣傳, 通知居民有關當局最新方案, 搞下居民大會了解居民訴求, 搞下簽名運動, 向政府反映下咁...最好可以請到當居官員落黎同居民交流
|
還是啟晴德朗只是少一個站
