朗豪坊自動扶手電梯意外引起大家對自動扶梯嘅關注，但係大家又知唔知，原來朗豪坊嘅自動扶手梯，係全港大廈內嘅自動扶手電梯當中長度排第三！長約42米，高21米。排第二嘅係Megabox，由一樓到五樓嘅自動扶梯，長約43.5米，高約21.75米。全港大廈內最長嘅扶手電梯就係調景嶺香港知專設計學院嘅一條，由一樓到七樓，長51.5米，高25.75米，2010年投入服務。
唔提大家可能唔記得，喺中環至半山嘅自動扶手電梯系統，係健力士世界記錄入面全球最長嘅自動電梯系統。全長800米，垂直高度有135米，93年落成，當時嘅建築費係2.53億港元，由18條自動電梯，同3條自動行人道組成，走畢全程需時25分鐘，好多電影都喺度取過景架。打破總長225米嘅海洋公園登山電梯嘅世界紀錄。
另外一條最長嘅係位於沙田新城市廣場嘅一條，係擁有全港最長緩衝區嘅一條。根據電梯資料網（HKELEV.com）嘅版主Edward解釋，緩衝區行內叫做「平級」，一般嘅作用係等使用者可以先企穩或者離開時方便啲，機電署對「平級」嘅長度係有規定。至於新城市廣場呢條有長達20級平級嘅自動梯，相信係2005年配合商場翻新工程，為咗遷就商場中庭嘅結構而設計嘅特長緩衝區。
咁到底全港最短、最攣、最舊、最騎呢嘅自動扶梯又有邊啲呢？你又有冇去過呢？如果你有見過其他特別嘅自動扶梯，分享吓好喎！
資料提供：電梯資料網（HKELEV.com）
撰稿：Kaman
攝影：Neo
剪接：Roy
