酷熱天氣警告發出好幾日，市民都有唔同消暑活動，不過牛頭角樂華邨有位女士就有特別方法消暑。話說星期二晚10點左右，樂華邨寧華樓11樓一條大廈淡水喉，懷疑用咗太多年終於抵受唔住壓力要爆，搞到大量淡水沿後樓梯湧落樓下。
讀者陳先生表示，當日佢一上到樓就成地濕哂，於是沿着水流見到後樓梯「好似瀑布咁」，再望真啲發現有一個年約40歲嘅女士坐喺後樓梯地下。陳先生話當時以為位女士跣低，仲諗緊點幫手，但即刻就聽到幾下笑聲，原來佢喺度玩緊水。只見嗰位女士身穿黑色中袖衫同黑色短褲，紮起頭髮滿面笑容，手拍拍水又企起身，走上幾級再坐低擺post，之後仲用手機自拍，一副自得其樂模樣。
不過，呢種方式似乎只有少數人識欣賞，陳先生話佢同其他街坊決定隔住防煙門睇呢位女士玩水，有人仲話唔明白點解咁開心。事關陳先生指因為爆水管關係，寧華樓2至11樓所有住戶都冇水用，佢自己到第二朝都要拎水桶落街攞水，雖然有啲唔方便，但佢讚房署處理爽手，唔到兩個鐘已經搵咗師傅維修，影響比想像中細。
