急！由S4轉返S1, 收到信要調查/深入調查/覆核
各位好.
事源是這樣的, 在上年2018年11月， 我哋去已配房的石硤尾屋邨辦事處簽意向書接受配房時，兩公婆還是在失業狀態，只靠儲蓄過活，但因為孩子快將出世，生活逼人，所以我先生經朋友介紹新工，在2018年尾簽約, 在2019年1月1日正式開始長職合約，而我哋在2月12日即農曆新年過後，馬上主動提交新工作的薪金證明去屋邨辦事處(1月整月固定入息為$19,700) ，按照2人申請+1個快將出生孩子，即3人家庭入息上限$22,390去計算，另加上我哋之前2018年6 月審查報的每月少量保險紅利(不超過$700) ，理應尚有一段距離才會超額的。
在2月15日，即附件輪候狀況還是維持已達配房階段，亦從區議員訊息得知這星期2月尾我哋獲配房的單位即將派鎖匙上樓
點知2月25日再查看輪候狀況，即附件圖又變回詳細審查階段，這到底是甚麼一回事？我哋有再致電屋邨辦事處職員，他們說我哋獲配房的單位已暫緩派發鎖匙，我質問該職員為何會這樣，他說已將我們整個申請檔案送回樂富房署作詳細審查，所以要等另行通知
我現時已懷孕9個月多，3月中至3月尾BB就會出世, BB出世後還未上到樓會造成極度不方便及困擾
為何我哋主動提交新工作的薪金證明，只想收樓入住後可以繼續過心安理得的日子, 反而令事情變得更為複雜?
其次就係, 我哋主動提交新工作的薪金證明之前, 有咨詢過屋邨辦事處3次
第1次, 就係2018年11月聽講解簽意向書時, 當時主任講解時話若果在收鎖匙之前入息資產有變動都要即刻匯報俾佢哋知, 之後我先生再問佢並舉例, 假設在2019年1月返新工係咪淨係需要填交薪金證明就得, 唔需要其他文件? 主任答"係", 我先生再問淨係填返6個月薪金證明就得? 佢都係答"係", 如是者我先生就喺2018年12月開始搵工, 好好彩經朋友介紹, 2019年1月1日正式開始新工長職合約
第2次, 我就喺1月中再打去屋邨辦事處搵返當時負責講解嘅主任, 但搵唔到佢, 反而有另一位主任接我電話, 我問佢同一個問題, 佢都係答要盡快俾返張薪金證明
第3次, 就係2月11日我再打去搵嗰位主任, 佢依然都係叫我先生盡快交啦
所以我就大住肚喺2月12日幫我先生交呢張薪金證明去屋邨辦事處
點知佢哋就將我哋成個公屋申請檔案FILE 俾返樂富房署配房組, 過咗無耐, 房署配房組就打俾我話我哋個CASE 要交返去審查組......
咁即係由一開始我哋交張薪金證明俾屋邨辦事處, 根本都唔係佢哋處理到嘅事, 仲要將我哋個檔案掟嚟掟去, 又HOLD 住我哋個單位唔派鎖匙, 仲要而家唔知幾時先審完..好困擾, 好浪費時間, 好擔心, 從中可以見到房署處事的程序係何其繁複及擾民, 真係唔怪得5.5年都未上到樓, 我亦都等了差不多6.5年, 望到終點都未可以衝線.........
究竟屋邨辦事處啲職員，係咪俾錯指示我哋？ 因為以我所知，收鎖匙嗰陣都要再報入息同資產，咁其實我先生份新工嘅薪金證明是否可以留到嗰陣時先報？ 從而可以避免咁混亂繁複嘅程序？我敢肯定2月12日當天，辦事處職員係已經知道幾時派發鎖匙，為何佢哋又無提出？
到咗尋日, 就收到附件另一封房署寄來的信...我哋另個CASE 仲要做啲乜, 要等幾耐先可以拎鎖匙? 事情發展會係點?
