家住2~3人單位，已入伙3年，一直受到沖涼時浴簾黐身呢個問題困擾。
我住迎東邨，入伙後得知浴廁面積比正常仲要細少少（與其他新屋邨同類型單位比較過，闊度窄半個階磚位），據聞係早期設計問題（當時迎東邨好多年前已動工，但因承建商勞資問題一直延遲工程）。總之導致未能成功安裝一般浴屏，就算裝到，個廁位會變到好窄好逼，而且清潔上都會好麻煩，所以一直都係用浴簾。
每次沖涼我都會詛咒鑽石型企缸嘅發明者?，明明係窮人專用仲改乜嘢名做鑽石？
有啲離題⋯總之，呢3年除咗浴屏外，我用盡辦法嘗試改善浴簾黐身呢個問題，我用過加鉛加重浴簾，又用過厚身浴簾，雖然內飄程度低左，但問題依然存在，而且花灑水壓越高，浴簾內飄嘅狀況會越嚴重（氣流與氣壓嘅現象我唔多講，我又唔係專家）。亦用過磁力擋水條、魔術貼或重物夾實浴簾底部等等以上方法，係就係有效，但會伸延出清潔麻煩問題，除非日日清潔，否則會有好多頭髮會攝住呢啲安裝喺地上嘅物料。
上個月行某大店睇到樣野，卒之俾我諗到個好辦法解決呢個困擾我多年嘅問題。決定po相出嚟分享俾同樣受浴簾之苦嘅街坊街里。
材料：某大店活動式毛巾架兩個，螺絲貼4塊（可鑽牆代替）。
