【on.cc東網專訊】 舊式公屋僭建情況普遍，房署事隔多年仍未取締！「以前好多人會喺窗邊裝個簷篷仔，可以擋下雨，晾衫又唔使驚有人掟嘢落嚟，但依家啲簷篷唔係生锈就係爛晒，睇見都覺得牙煙！」洪先生自小於石硤尾邨長大，直指早年不少住戶均會於單位外牆加建簷篷，至近年已出現生锈及破損，不但失去原有遮風擋雨之效，更擔心有塌下危機。洪又指簷篷建於單位外場，一旦塌下行人將首當其衝，「舊屋邨冇平台、冇花圃，有嘢跌落嚟行人好易中頭獎，房署冇得唔理！」
記者曾實地視察，發現不少住戶在大廈外牆加建鐵片簷篷或花架，雖大多以工字鐵架鑲在位外牆，惟簷篷或花架早已布滿锈漬，部份鐵锈漬更染至牆身，亦有鐵片已呈破爛。有部份簷篷則僅以膠板鋪設，但疑長久未有維修而缺損，未能起遮風擋雨之效，隨時有塌下危機。
「呢啲簷篷通常都係好多年前起落，依家已經日久失修，房署應該檢視下有冇危險，如果有問題就要盡早拆咗佢，免得有意外跌落嚟影響到途人！」當區區議員秦寶山指出，早年房署對租戶於外牆加裝簷篷或花架多以寬鬆態度對待，惟有關裝置經過多年風雨侵蝕後，已出現生锈及損毀，危及途人安全機會大增，要求房署正視問題。秦又稱，石硤尾邨將展開安裝新晾衣架工程，希望房署可一併處理違規僭建物，以達至零風險。
房屋署發言人證實，租戶倘私下安裝簷篷屬違規行為，當局會要求住戶自行糾正，否則會發信警告有關住戶，甚至發出「遷出通知書」以終止租約並收回單位，但對於部分有經濟困難的租戶則會酌情處理。發言人續稱，石硤尾邨屋邨辦事處會在大堂張貼通告及透過《屋邨通訊》提醒住戶有關管制，過去2年亦已糾正逾40宗違規安裝個案，並會在未來數月的晾衣架工程中，一併視察及移除違規裝置。
