我全屋傢俬(全屋地台, 地台床,一個到頂的間房櫃及一個到頂的趟門衣櫃) 廚櫃都向大陸訂,有師傅落嚟香港度尺,今次交既學費係人民幣三萬。
分享今次訂傢俬經驗, 希望啲資料有用。<個人見解,不喜勿看>
1) 份約一定要詳細註明每件傢俬用咩材料, 顏色, 及尺寸。如果佢話詳情見圖紙, 要對清楚圖紙有無打錯打漏色號。仲有唔見光的位置是否有貼面板 (做焗漆都要問, 唔係佢哋有機會唔貼同整咗唔同色) 同埋做傢俬間廠係佢自己廠定外廠。外廠, 間舖佢哋多數控制唔到班工廠師傅的。
2) 最好搵交通方便的店(個人覺得, 近地鐵站會好D, 因為的士成日塞車) , 我呢次貪平,搵咗間遠, 除車程耐同車費都唔少(因為唔近地鐵站,每次都最少40蚊的士)。
3) 睇圖紙, 要睇清楚有無寫錯數, 因為有時師傅寫啱, 畫圖果個寫錯。佢肯重做比你, 你都要等送等安裝。盡量睇清楚, 唔好急住確認。
4) 佢哋出圖後會要你比一半訂金, 呢個時候一定要問實幾時可以睇貨,無問題幾時可以安裝。一定要佢比明確日子你, 先好比訂金。而你自己亦預佢比你個期遲1至2星期 ~ 我比咗大訂之後, 佢先話我知我之前要求果期唔得。未比錢前一定咩都話得!
5) 尾數, 最好係可以扣起部份, 安裝好後先比。佢哋多數會做錯同漏嘢。(我上廠睇貨時見到個細櫃, 但落嚟唔見咗個細櫃, 地台無裝氣鼓等….)。
6) 個人覺得做焗漆效果會好過貼板。
7) 度尺同安裝最好係同一個師傅。
8) 廚櫃, 最好裝咗錶同改咗喉先叫師傅度尺, 咁做櫃個會靚D或者做龍門架……唔係就好似我咁, 個櫃背千瘡百孔~~
9) 做好上去睇安裝, 一定要佢全部裝一次, 同一定要帶圖紙,同必定要量尺寸。唔好怕煩!
10) 送貨同安裝最好係同一日開始, 仲有千萬唔好貪方便, 比鎖匙師傅, 我明明只需安裝2日, 佢足足整咗成個星期, 因為佢有其他嘢做(自己廠)。
11) 有咩都唔好同班師傅嘈(唔係怕事), 係你嘈師傅蝕既係自己,佢打少2粒釘你都唔知。
希望各位街坊都搵到好師傅同合心水的傢俬店~
仲有，要留意報價係平方米定平方呎。計法有差別的~本帖最後由 rubyip730 於 2015-10-31 08:18:39 編輯
