揀特快…心情就如同坐過山車………無奈……

LittleTina

揀特快…心情就如同坐過山車………無奈……

（長文慎入 ）

一直都好長遠計劃左……如果特快揀到個細dd的1-2人單位……
第時住落生多兩個調遷就好辦事了……
所以今期特快都捕住哂d單位揀成點好著緊……
見過無數咁多有興趣揀的單位一日一日咁o係揀樓list消失……
情緒都經歷過唔少上上落落啦……

截至上星期自己出左揀樓時間知道係第一批，而又已經有左當時最新揀樓list…
上星期三晚已同家庭成員傾過…因為淨返得哥1x個咁少，冇哂市區擴市1-2人單位得返屯門天水圍咁…
品質又似乎唔係高……決定左：唔揀，等新樓。
不過…我就諗住去參觀下特快但唔揀ge…反正得閒…

然而，去到正正揀樓前的一日，我再睇多次條揀樓list研究下良景個1-2人單位的圖則，
又出奇的發現，其實都好夠用，個單位其實都好fit我地將來想調遷的計劃……
雖然哥下你問我，我其實都覺得個單位未去到真係咁吸引，
始終個單位兇宅唔知咩事，同埋我都係偏向想搏新樓，想跳出新界西的……
但當時有呢d研究發現都要同返另一位家庭成員報告下ge，
好意外地，我的家庭成員竟然好想揀良景個單位，覺得都係留o係屯門方便過搏水仔/迎東
（佢由細到大都係屯門人，返工至愛點對點搭巴士－ －" 而我地每星期weekend都要返屯門有聚會）
而且加埋又唔洗等咁耐，又o岩哂我地第時想擠迫戶調遷的計劃……
當下就臨急決定左我第二朝出去揀到就要揀左良景的單位………o係3日冷靜期再研究再考慮咁話……

其實揀樓當日我好緊張……全日心情都好忐忑不安又充滿猶豫……
當時我都唔知我祈求想揀到定揀唔到了……因為當下我都係比較想搏新樓…
揀都係因為另一家庭成員真係好喜歡似的……我都想尊重返佢的意向……
我好怕揀完之後到時真係太細，又或者往後見到咁上下number派到水仔自己又會唔抵得同埋後悔…
而且我唔同我的家庭成員，我係有種好想藉此機會跳出屯門跳出新界西的意欲……
哥陣我就有諗：「如果揀唔到就一天都光哂 專心等新樓啦」
又或者又諗定「如果揀到 係咪應該去睇環境然後話怕兇宅哥d 話都係唔要呢」
如果評分，要特快係0而搏新樓係10…當時我應該係8左右吧……

然而……我唔知係幸還是不幸……
「我…揀到特快……」
揀到當下係有d成功感的，但伴隨其實都係好忐忑好懊惱好唔知點算……
結果就不安地即刻去左睇樓…又咁o岩比我上到去撞到隔離屋剛回家問左好多野……
睇完樓之後……其實我覺得一切的正面因素都多左……當時我就應該真係50 50左右…
主要的負面因素都係仲有dd咁多唔甘心以後都要做屯門人，同埋排咁耐都要揀特快，有d心思思想搏新樓……

下晝都同左一d朋友傾過，可能因為哥d朋友都又係屯門人，大家都會好撐要良景…
傾完都令我更覺得屯門真係方便我地返父母家同埋聚會……o係呢點良景都真係好過水仔迎東啦……
而良景仲要o岩我地第時想調遷ge需要(即係要夠細)，又高層又交通方使…
慢慢自己都開放左，對搏新樓冇咁大欲望了…因為心諗，揀得呢度都為第時擠迫戶調遷排前d…咁到時排得前想揀新樓兩房都ok呀…到時未有新樓lor…
問題都只係跳唔出屯門區…而自己都開始諗住最多疊埋心水做死一世屯門人啦……
當下，如果要下再評…可能係 「良景 8:2 搏新樓」了！
開始為著揀到個o岩心水單位會覺得開心啦…仲愈諗就覺得揀良景愈好……豈料………

（續）

LittleTina

尋晚（其實都只係一揀完樓當晚）同左屋企人講揀左良景的特快單位……
母親大人一聽完兇宅就極強烈反對…佢講話記返起表姐住過兇宅遇過污糟野哥陣佢都唔敢上表姐屋企…係咁話兇宅真係萬萬要不得……
然後同表姐傾電話時又交過電話黎叫表姐分享親身經歷同幫手勸我（其實我聽完都唔覺得好驚）
跟住佢又責怪另一位o係揀樓前支持我地揀良景單位的家人，
話「你做乜叫佢地揀兇宅呀？」「兇宅冇問題？緊係有問題啦！！！！陣間XX放工返黎你快d幫手勸呀！」

其實……我個人就真係唔算太驚兇宅…我覺得真係要入到去先知，不過咁樣就會用左次機會啦……但so far到哥刻我都係想去馬ge……
但你問我，我又未去到另一位家庭成員咁強烈想要良景個單位ge………
當另一家庭成員回到家，母親大人就好正經好認真咁樣棟左o係房，然後就入黎訓話式命令式咁叫快d取消左個特快兇宅._.
接近似係要迫到那位家庭成員開口話「唔要」先肯走咁樣……
明明真係住哥個係我地，要撞污糟野ge都係我地……屋都未入去睇，母親大人就係咁話佢好驚呀好驚呀好驚呀…
然後就講定話如果我地要間屋，將來要收貨check煤氣暫托小朋友佢都唔會敢上黎……然後就話「一定唔要得」……
成件事，我覺得真係好恐怖，仲恐怖過兇宅……點都係怕「逆母親大人意」多過怕「兇宅撞鬼」……

心情真係好複雜，亦都好無奈……我由本來偏向想搏新樓，去到漸漸鍾意揀左個單位偏向要左佢……但結果又比母親大人強行拉返轉頭……
依家個單位唔係我地唔想要…而變左係「唔要得」……o係母親大人企到咁硬的情況下…另一家庭成員都只好退一步……
今日，抱住「應該都係要放棄個單位」的諗法，我早上10點再去睇左次，另一家庭成員就晚上9點去睇一次，
o係單位門外／走廊／屋村範圍仍然都係feel唔到任何古怪野，而且都感覺幾良好……
可惜，再同母親大人傾，即使唔係一句「一定唔要得」都係「唔想你地要lor」……
而由另一家庭成員作的最後決定：「放棄特快良景單位」

唉…我真係好無奈好無奈
勢估唔到由唔想要去到好想要…而最終會係變左「唔要得」
唔要ge最大原因竟然係一個冇份住ge話好驚話唔想要……＼ ＿ ／

本來要左良景就好地地唔洗煩驚黎緊會派d咩……但依家我真係有d擔心黎緊幾次唔知派乜了…
如果派到東涌/沙田新樓 我就都應該冇野ge…畢竟都係原先計劃內…
但如果真係三次都唔中新樓而比哂大面積ge舊樓搞到第時調唔到遷…我就真係死比母親大人睇都得啦……
（諗諗下…我希望第時派垃圾房旁邊垃圾站對面或者座向唔好室號唔好…母親大人唔好又話萬萬要不得……）

再見了，良景的特快單位
其實o係呢刻我都真係幾鍾意你ga…
認真…無路可揀…只有含淚拒絕……


（如果你睇到最後呢度…感謝你的收看）

terrytang78

回應 #2 LittleTina

妳應該係選呢個單位！我個人覺得冇問題！

抱歉！ 你無權閱覽或下載此留言的上傳圖片或文件｡
如果你已建立帳戶但未登入, 請按此登入｡
你未建立帳戶？ 請按此建立帳戶｡(完全免費)
建立帳戶後請按此重載本頁｡

jp_dannywong

我又真係睇晒你編文喎....希望你會派到理想單位... 加油~   

Mankiho

我都睇哂 加油

影月1973

睇完,從長輩的角度看,佢地無錯;從外人的角度看,一定唔要(等5年要兇屋);你地睇到好多好的一面,但其中一個負面一出現已吃不消了(雙方家長齊堅決反對)..........奈河.........其實拒絕的cost唔大,都未到塞翁失馬的地步.........

kalie0715

我都睇哂。

SolowHK

兇宅怕怕。

cherryybl

明白你的心情，也明白你家人的心情！我揀特快也沒有告知家人，始終住的是自己，也深信凶宅只是心理問題。不過點都好，希望你快d派到心水樓

LittleTina

回應  LittleTina
妳應該係選呢個單位！我個人覺得冇問題！
terrytang78 發表於 2016-11-11 01:40:06 原文

個人覺得冇問題都冇辦法……要釋除家人疑慮冇得我揀…