屋企對面屋一家幾口(走廊尾)，隔個單位(走廊頭)就係20幾歲男戶主退咗休嘅媽媽。佢成日都會走過去對面單位搵佢嘅仔、孫女一家幾口，有時企喺門口街市叫賣咁大聲同嗰一家幾口講嘢，就算對面一家人出咗去，佢成日都會行入去攞嘢，頻繁嘅時候，可以10分鐘內拉閘三次，一日內拉對面屋到閘20至30次。(我數過)
最頂唔順係昨日星期日朝早(逢星期日出入得最頻密。)，八點幾差唔多九點，又踢住對拖，開閘企喺度同佢個仔大大聲聲講嘢。唔夠15分鐘，又喺佢嗰邊行過去我對面嗰度，兩個單位經常咁樣開閘同閂閘，咁頻繁其實真係好滋擾，我已經好幾次醒咗都瞓唔番。
其實之前有畀張紙條仔同對面屋反映過，問過鐵閘聲、門口傾談可唔可以細聲啲，特別係佢小朋友會喺走廊度大嗌大叫，咁對面屋一家幾口時候拉閘都聽得出係有刻意細聲啲，都避免喺門口大聲講嘢，同提個小朋友唔好再喺走廊度大叫。
個嫲嫲其實都知道我被呢啲聲音困擾…但唔清楚係咪佢以為我淨係比張字條對面佢個仔嗰一家幾口講…所以唔知道佢咁頻繁行出行入都困擾我。
考慮方法
我有考慮過要唔要同對面屋個男戶主傾傾？
例如
1）建議佢媽媽可唔可以拎嘢一次過拎？
2）或者係短時間裏面要再入去佢個仔間屋嘅話，就搞掂晒先再拉鐵閘
3）一係就拉鐵閘嘅時候細聲啲。
另外，因為之前都已經貼過張便條仔喺人哋鐵閘，再貼驚冇咁禮貌同埋煩到人。
諗緊...
1）今次係咪真係撳門鐘當面同個男戶主傾傾
2）或者等咁啱大家出門口見面嘅時候再講講呢件事
3）又或者寫張聖誕咭同買零食物語嗰啲零食禮盒…再夾封信講返個情況…拎個靚啲嘅紙袋仔掛喺人哋鐵閘度
我想大家鄰舍關係好來好去…請問大家點睇？
經常都瞓得唔好真係好辛苦…連續個幾月都係咁…昨日星期日已經開始頭痛～?
（代發帖）
