其實如果係半新二手居屋或二手綠置居都唔太抵買，因為價錢比起一手係貴咗好多，原因係呢類房屋享有好長年期嘅房委會擔保貸款。所以最好都係買一手。
如果夾硬要揀，咁咪揀二手居屋囉，因為通常居屋折扣少啲，第二時如果要補地價都唔使補咁多（所以其實應該係以實際折扣率考慮，而非以居屋定綠置居考慮）。咪以為冇補地價嘅需要，因為未補地價嘅資助房屋係唔可以出租、丟空、自由轉名、融資。而人生溜溜長，總有啲時候係需要做以上嘅事情，例如：
- 你老咗，子女結咗婚搬走咗，而你因為想降低生活成本而搬返內地居住；
- 與上述情況相似，不過唔係搬返內地住，而係想出租自己間屋，然後將收到嘅租金用嚟租間平嘅屋住，剩餘嘅錢用嚟做生活費；
- 你需要應付一啲大開支，例如結婚、做生意、醫療等，但你手頭冇咁多現金，所以想再次將間屋按畀銀行以提取現金。
