小病是褔

亞力山大帝

小病是褔

我星期五晚12點開始有少少喉嚨痛唔理佢，點知訓到半夜3點，就痛到醒左無訓過，仲失埋聲添！

第二朝返到地盤，兩隻狗仔跑埋我度係咁癡住我，我同佢地講：唔玩住啦，我唔舒服呀，妳地自己玩呀！佢地就好乖咁行開左，轉頭仲過黎我位度趴係度望住我，好似真係知道我病咁！佢地平時都唔會咁既！

入到寫字樓，亞姐、小姐、平哥、爛橙都見我死狗咁既樣，走黎問候我，又話病就請假抖下啦，我話今日係我試用期最後一日，未有病假住，況且我諗住請佢地食晏！（正確D講應該唔係「講」，係「寫」俾佢地睇！）佢地又幫我斟水、又俾藥我、又問我食左早餐未..........

跟住誠哥（路政署亞sir個司機）過黎同我講：行啦，車你去睇醫生呀！我話：傻既咩，俾亞sir知道就大鑊啦！佢話：亞sir叫架，佢頭先見你個樣咁病，特登叫我車你去睇醫生，佢就call另一部車出去HQ開會！

睇完醫生，柄埋係地盤個貨櫃寫字樓度訓左一陣，訓醒見老闆、火頁人同威哥三大巨頭黎左，我就拿拿林戴帽著衫上地盤，老闆見到我就問我：你個樣好唔舒服喎，唔駛陪我行啦，落番去抖下啦，橫掂今日星期六都無咩搞，一陣食飯嗌你啦！

到左下晝，同火頁人開完會，佢臨走同我講：一陣無咩特別野既，就抖下啦，唔好週圍走啦，D野星期一先搞啦！

講到呢度，我係想講，原來我有一班咁好既亞sir、同事同兩隻咁乖既狗狗，雖然有幾個係公事上唔係好啱傾，但係其實佢地個人都無咩野既！好彩我今次病一病，如果唔係，我諗我都唔會係我試用期最後一日，知道佢地咁好人！

pegpeg

但你都要小心身體 , 好好休息 唔係我地點慰問你都冇用架..... 我地等緊你去蒲架

MaggieWong

呢d係唔係叫做患病見真情呀
大帝祝你早日康復,休息多d喇,記得飲多d水呀

Annie妹妹

皇兄, 小心身體呀...

賈定珍

真係恭喜你可以搵到班咁好既同事. 唔係個個打工仔都可以係工作地方搵到班咁會出自真心既好同事架.  你要好好珍惜喇.  果然小病是福.  病住返工都抵番哂.



祝你早日康復, 少左個人去玩點都差左d架.  知無?

[ 本帖最後由 賈定珍 於 2009-3-2 21:24 編輯 ]

ericceng

格古LOK

大帝你仲可以講咁多嘢嘅 多D休息,飲多D水,准時食藥

kennyip

有一班咁好既亞sir、同事同兩隻咁乖既狗狗

患難見真情, 有一班好同事 真好
仲有兩隻乖狗狗tim~

祝大帝你早日康復~

[ 本帖最後由 kennyip 於 2009-3-2 21:20 編輯 ]

chriskong

大帝:
看大家多心疼你!
忍病返工!以後放些便利中醫葯在身旁吧!
祝你早日康復!

VickYeung

皇上要保重龍體呀 ~