大家好，我已經揀左樓，無任何利益沖突，為左回饋論壇對我的幫助，我覺得有責任要等大家認清現實。
好多...
harrynick 發表於 2019-04-14 00:10:39 原文
多謝樓主開呢個主題黎講，呢度好多之前傾開既網友都揀左樓（包括小弟）咁我都講一講自己既諗法。其實我之前抽過景泰綠置居、翠嶺峰及翠鳴臺、居屋2017及居屋2018，每次抽獎一次後過一次，其實後期都已經係平常心看待，其實預期中係無綠置居呢類野出現，當初第一期綠置果陣仲係梁振英年代，而且個名係先導計劃，亦講到明話唔會係長期方案先視乎公屋輪轉情況。但居屋2018後政府話出麗翠苑做綠置居，其實真係喜出望外，因為個位置係超靚，市區樓贏既係方便，而佢係方便中既方便，近荔枝角商業區，生活休閒既配套都齊，而且附近一帶都待重建，不論住定前景都係優質。但因為之前唔中既機會太多，都只係一試無妨心態，而且又唔駛錢，唯一值得期待係我媽剛好係綠置截止前1星期剛好夠60歲變長者戶，直到中果日，我都無留意，係有個fd同我講你中咗，因此我先入去睇，係第三粒珠。最終加上綠長爬上幾百位就成功揀到心儀兩房單位（綠長都唔係無敵，首要都係要中得前先）
係揀之前其實都有一個朋友同我講，下期有何文田三房喎，超靚地段，然後叫我揀下期，咁我當然笑笑下算，我心諗都on居既，因為我知抽獎既機會，當然我唔會信佢咁做，今次當係中左六合彩頭獎，無理由唔要係為左下期唔係必中既金多寶。所以如果有得揀2房既人，無得揀乜野靚座向高層等等，呢D唔係原因黎架，而家唔係你買私樓或者上公屋揀單位呀！抽新樓既野，你今次中，無人包你下次一定中，可能呢世都唔會再中都有可能架。而且仲有一樣野，有大買大，話咩夠用就得唔駛太大其實真心果句，廢話黎，李嘉誠全家住1千呎都夠架，點解佢要住別墅？我聽過一個老一輩同事講，佢當年就係買左高層無咁大既居屋，佢話果陣無得揀再大d,買樓一定係以size行先，寧願要1樓對垃圾房既大房都唔要高層細房。
最後，真係中左可以揀既人，唔好輕言放棄，而家抽呢類房屋只會越黎越難，綠置居下期已經要2-3年樓花仲要唔係市區，居屋出埋今年市區餘下亦越黎越小市區，仲有居屋綠白表比例由64變55，遲早變46甚至37，需求越黎越多，配額越黎越小，有長者既人士唔好咁老定，揀樓既大前者係你要中左頭1-5粒珠先，長者係再有無揀好單位既條件，你並無因為咁而令到你中頭珠既機會增加，只係中左之後你比人優先咁解。
