話說今日係裝修完工日, 裝修公司之前仲話可以早2日搞掂, 等我入屋搞清潔, 結果...
完成部分：改電制, 間房, 裝門, 油油, 地磚, 石屎底座連雲石, 裝抽氣扇, 熱水爐
未完成部份：假天花連燈, 浴屏, 各個櫃及櫃門,抽油煙機, 電磁爐都未裝, 水喉仲要拆完未裝番 (簡單d講就係廚廁都唔用得)
我知道呢排係旺季, 簽左約成10日先開始做野都算, 我唔介意遲少少收樓, 但以下既野我真係好介意!!!!
1) 我度門同門框係白色, 一來貨我已經見到發黃, 門框仲要撞「粒」左幾個位, 鎖邊個位又裁得好肉酸
2) 新加電制唔係新的, cheap都算仲要好舊!!!好似用左好多年咁! (好彩只加左一個)
3) 新加閣仔由白色變左米色
4) 櫃門既把手唔係成水平 (低級錯誤), 邊口是披的
5) 我多次問究竟可否25號收屋, 次次都拍心口話冇問題
6) 將我同其他客戶混淆, 明明冇同我講過既野就死都話同我講左! 我冇講過既野又話係我講的!!
最嬲既一件事, 因我知自己唔係做呢行, 怕雞同鴨講,
所以0係我報價同簽約兩日比左幅大致設計圖佢地睇,
講明我要洗手盆同櫃向馬桶, 當時佢地仲話「得啦, 我地做左好多架啦, 識做架啦!」
結果個洗手盆石屎砌錯左 (應剛剛鋪, 因泥仲係濕), 我打去同佢地講,
第一句係「唔好意思唔記得左, 即刻改番」,
隔左2分鐘又打黎話「唔係喎, 係你當初冇同我地講過要改喎!!」
我已經嬲, 講「我一開始報價同簽約已經有同你地講, 仲拎埋圖上黎比你地睇架喎」
佢地就話「我地係睇我地個圖既姐!」又問「咁你係咪又要改返?咁又要訂過哂d櫃!」
跟住聽到佢地不停講麻煩...
好, 我當今次溝通唔好, 我都忍
到今日收樓啦, 上到去間屋同幾日前差唔多樣, 我打去問唔係今日收樓架咩?
佢：「咩呀! 講左今日收唔到架啦! 遲2,3日丫嘛!」
我：「你係話個櫃2,3日後到, 遲d安裝, 但今日係可以照收樓丫嘛, 但係你d假天花, 浴屏都未裝喎」
佢：「緊係未裝啦, 要遲d到呀, 咪就係因為你中途話要改洗手盆位, 搞到櫃門要造過哂,
咪要等造哂先裝得假天花, 浴屏囉! 你急既可以入去住住先架!」
我：「水喉都未裝好, 我點入去住呀,抽油煙機, 電磁爐又未裝 ...咁所有野完全裝好要幾時先得呀??」
佢：「得啦得啦, 今日叫師父上黎整啦, 下星期尾啦, 應該得架啦」
真係嬲到震, 將責任推哂落我度, 當初我已經用盡我方法表達要求(說話+圖), 你都唔聽,
仲反將錯誤說是我一手造成,
呢間公司係大家都話唔錯我先搵佢, 結果我係每隔一日就上去一次睇進度(1星期上去4次), 好怕佢再做錯野!!
現在我只希望盡快完工, 早知佢既用料同服務係咁, 可能我搵承仔都冇咁嬲!!
咁都得呀
