2016-07-10 12:50:00 HKT
今屆奧運會首次喺南美洲舉行。睇返歷史,原來南、北美洲加埋,都只係舉辦過六次奧運會,遠遠落後舉辦過16次奧運會嘅歐洲。不過原來有一個洲份,至今都未舉辦過奧運…佢就係非洲。
歐洲舉辦過嘅16次奧運會分佈喺10個國家。巴黎同希臘分別搞過兩屆奧運,不過都唔夠倫敦咁勁,分別喺1908、1948、2012年三屆舉辦過奧運,係現時唯一一個三辦奧運嘅城市。不過美國都唔輸蝕,佢喺1904、1932、1984、1996年都成為奧運主辦國,係舉辦得最多次奧運嘅國家。亞洲就舉辦過3次奧運,嚟緊東京會喺2020年再次成為主辦國。至於非洲呢,就真係一次都無啦。
主辦奧運一直係國力嘅象徵,不過唔講唔知,原來喺上個世紀,原來曾經無國家想申辦奧運,原因係因為奧運實在燒太多錢。不過自從1984年洛杉磯奧運開始賺錢之後,奧運就已經變成咗一個提升國內經濟嘅機會,除咗有來自門票、電視轉播、廣告、同贊助等等嘅收入,仲可以創造大量就業機會。
據聞南非嘅約翰內斯堡、埃及嘅開羅、摩洛哥嘅卡薩布蘭卡、肯雅嘅內羅比等非洲城市都可能會申辦2028年奧運,希望非洲人民快啲有機會,可以分享奧運帶嚟嘅呢份喜悅啦!
倫敦曾舉行三屆奧運會
美國上一次舉行的奧運會是1996年阿特蘭大奧運