衰過食糖 飲白酒食薯片更傷牙?
2016-09-27 07:06:00 HKT
唔好再話小朋友成日食糖會蛀牙啦,大人成日飲白酒原來啲牙仲快壞呀!
提子乾比糖果更黐牙、更易殘留在口腔,蛀牙機會仲高過食糖。
代糖是酸性的添加劑,跟真糖一樣會侵蝕牙齒。
薯片被咬到好碎之後,碎屑易於藏在牙縫,經口水分解變成單糖,又係同糖果一樣傷牙。
好多人覺得咬冰好爽好有口感,其實咬冰令牙齒承受很大壓力,分分鐘會咬裂或咬崩牙!
飲完酒牙齒琺瑯質會被酸性環境軟化,立即刷牙反而令牙齒更快變壞。
邊飲白酒邊食高鈣芝士,有助改善口腔酸性環境,減低壞牙的機會。
由細到大都聽人話食糖會蛀牙,大個咗唔食糖,原來都仲有好多食物好傷牙!加州牙科博士Justin Sycamore就指白酒、提子乾、代糖食品、薯片和冰粒都是最壞牙的,到底點解呢幾樣食品咁大鑊呢?
白酒以為飲白酒比紅酒更好,因為唔會有酒迹,其實白酒如Chardonnay酸度好高,比紅酒更快侵蝕琺瑯質,長期飲白酒會令牙齒對冷、熱和甜食更敏感。飲完白酒牙齒琺瑯質會被酸性環境軟化,立即刷牙反而令牙齒更快變壞,唔想咁樣,可以邊飲邊食芝士,因為芝士是高鈣食品,有助改善口腔酸性環境。
提子乾細個阿媽一定話食提子乾好過食糖,其實提子乾也含大量果糖,而乾了的水果令糖份更黐牙,殘留在口腔比糖果的傷害更大!唔想蛀牙,可以食果仁,無糖份還夠飽肚。
代糖食品汽水或香口珠的代糖正是酸性的添加劑,跟真糖一樣會侵蝕牙齒,傷牙程度都同真糖相約,改飲代糖飲品對防止蛀牙絕對冇幫助!
薯片以為食鹹嘢冇事?其實食脆脆潛藏好大危機,因為薯片被咬到好碎之後,碎屑易於藏在牙縫,碳水化合物經口水分解變成單糖,同糖果一樣傷牙。
冰就咁飲凍飲加冰係無事的!但咬冰呢,就係問題所在啦。好多人覺得咬冰好爽好有口感,其實咬冰令牙齒承受很大壓力,分分鐘會咬裂或咬崩牙,如果真係咁口痕,牙醫建議你都係咬下同樣有空氣感的低糖或低鹽爆谷比較安全。
記者: 容慧心