2016-10-10 08:14:00 HKT
費清屋苑有提供免費上網,但最近供應商退出,所以住戶要自己搵寛頻服務。寛頻供應商都差唔多,費清反而為個Wi-Fi router煩惱。
因為屋苑間格牆太厚,所以廳嘅Wi-Fi router,喺房接收唔到,所以一直喺房安裝多個router提供上網,但費清搵嘅新供應商只提供一個router,喺房裝多個要畀雙倍月費。
費清朋友建議喺廳與房之間,安裝Wi-Fi extender,將廳嘅Wi-Fi延長,令房接收到。費清買咗,但之後喺廳原有嘅Wi-Fi router有「驚人發現」。
原來廳嘅Wi-Fi router係雙頻,同時提供2.4G及5G頻道,費清當初關閉咗其中2.4G頻道,因為專家話市面大部分Wi-Fi router、遊戲機、無線滑鼠、藍牙耳機,甚至智能家居產品都係用2.4G,所以頻道易塞車,而5G相對少人用,而且又快又慳電。
不過,費清今次睇router說明書,先知5G有個弱點,就係穿透能力較弱,如果啲牆太厚,就會穿唔過!唔怪得之間房收唔到啦。相反,2.4G穿透能好得多。
費清拿拿淋喺router開返個2.4G頻道(說明書有教,好容易),然後用手機喺房接收Wi-Fi,結果由本來咩都收唔到,變成都最少有3格,算係咁。
不過,既然都買咗個Wi-Fi extender,冇理由唔用㗎,就係咁,費清就生活喺一個充滿Wi-Fi嘅地方……