回應 fc_pga
我已主動提了由彩福去:
1. 金鍾、中上環
2. 港島東
3. 旺角、尖咀、紅磡
4. 深水步、長沙灣
5. 沙田
6. 荃灣
至於係開新線、改舊線、重組合併,我認為由巴士公司提出後,我們再作研究,收集大家意見,俾向運輸署反映,比較合當。因途中經的站,會否影響現行乘客、環保因素等等,在別區我認知始終有不足。
如果要直去旺角的話,你可考慮到彩盈坐紅van
如果每日9號巴士得1班車,仍有十名彩福居民使用,我認為試車已成功,巴士公司應將9、111p、606a改為全日行駛
顏汶羽 發表於 2011-12-1 07:17:51
主動提出要開巴士線去呢度果度, 同埋主動了解區內交通網絡, 提交詳細建議, 係兩個完全不同層次.
只係識要求開巴士線去某某地方, 運輸署同巴士公司的想像空間可以好大,
隨時提出一d垃圾方案玩我地而你唔發覺, 就好似條9號巴士咁.
相反, 如果你能夠更有建設性, 提出一D實際方案的話, 運輸署同巴士公司就會針對果D方案直接進行研究,
已經慳返成個步驟. 如果你提出的方案真係可行, 合乎佢地底線的話, 佢地自然就會執行.
你可以睇下全港各區, 近年好多巴士線重組, 都係議員 (包括貴黨其他區的區議員) 提出詳細方案,
交俾運輸署考慮, 接納之後就即刻可以執行的.
講返你的建議:
1 & 2:
金鐘, 中上環直接將111全日拉上彩福已經搞掂, 111P個行法, 相比其他過海線其實唔算慢.
至於港島東, 我可以好肯定咁講, 606A無可能全日, 因為全日就一定係由606抽調資源,
但係606而家已經好疏車, 而且你咁將條606抽一半甚至全部班次上山,
搞到對面海東區無左巴士去九龍灣工業區載佢地返工放工, 你估人地會唔會反枱?
反而爭取下午繁忙時間一兩班回程服務就好合理.
去港島東需求根本唔大, 但係606A當然有好過無, 起碼去鰂魚涌, 太古坊都算好直接,
呢個case唔可以同去旺角/尖沙咀, 需求大但係9號車要兜餐飽搞到無乜人搭一概而論.
港島區來講, 如果彩福唔係有一半人口足不出戶的話, 全日加埋最大需求
應該係北角, 銅鑼灣同灣仔, 但係你又隻字不提.
3:
而家9號車已經要1小時10分先出到尖沙咀, 如果你係想要一條經旺角, 尖沙咀先到紅磡的巴士線,
要幾耐先去到紅磡? 行落山搭15或者28號巴士去紅磡, 車程都只係20-25分鐘咋.
4:
深水步, 長沙灣根本直接拉6D繞經已經搞掂, 點解你只係提要求設巴士線去深水步同長沙灣,
而唔係直接向運輸署建議6D繞經彩盈?
5 & 6:
而家觀塘無一條遠離港鐵站的屋村有巴士去沙田同荃灣, 幾時輪到彩福村?
我唔係話無需求, 但係返工需求一定係集中晌旺角, 尖沙咀, 長沙灣, 紅磡呢D傳統返工地區.
觀塘而家條條村要入新界, 都係靠巴士線轉乘優惠, 例如順利村有23M/29M,
藍田有16M, 油塘有14B, 秀茂坪有13M, 轉車入新界, 觀塘入面果程可以有$3.8優惠.
因此你其實應該爭取開條區內駁腳線, 方便我地居民轉車入新界.
相比起新界線, 彩福其實更加需要一條駁腳線, 方便轉車之餘,
可以載我地去觀塘巿中心同聯合醫院, 有巴士線去醫院, 去巿中心實在係好基本的要求,
去觀塘巿中心的需求肯定大過入新界好多, 但係你又隻字不提.