外傭中介公司弊病百出都唔係第一日嘅事，喺上星期先又有一間僱傭中心因爲濫收中介費畀人釘咗牌。所以推行《 職業介紹所實務守則》都叫有好過冇，話曬可以畀業界有個參考，提高規管程度。不過既然係為咗促進服務質素，點解守則入面完全 冇回應過外傭跳工嘅問題呢？ 唔少外傭僱主都同我反映，外傭跳工嘅問題嚴峻，不良中介會慫恿外傭搏炒，爲求攞一個月代通知金同機票費用。僱主就突然變雙失，中介費又冇咗，賠償金又畀咗。僱住？苦主？傻傻分不清楚。同時，中介又會轉介外傭畀另一個僱主，食曬兩家茶飯。今時今日，咁嘅服務態度點得㗎？我認為政府應該儘快研究設立一個月嘅外傭合約試用期，等試用期完曬，中介公司先可以收中介費。任何一方喺試用期内提出解約，都唔需要畀代通知金，而雙方都唔需要俾中介費，有好大誘因令中介公司盡力喺一個月內幫雙方修補裂痕，嚟翻個矛盾大化解。將試用期同中介費掛鈎可以保障多方權益，一嚟可以唔洗僱主無止境咁「科水」，又可以加强規管中介同外傭嘅操守。想乜都冇做就有得pay？諗吓好喇！@(公開版)香港外傭僱主關注組 Support Group for HK Employers with FDHs
本帖最後由 folee0001 於 2017-03-03 16:34:26 編輯
