|
心情動態：
來自非公營房屋 |
床舖抽濕有絕招
濕度繼續升到95至100%，全屋濕笠笠，尤其連瞓覺張床都笠痴痴，費清今日再分享床舖吸濕心得。 最直接方法當然係開抽濕機啦，但除咗要電費，亦都要有人喺度至可以開（抽濕機過熱引致火警時有所聞呀）。費清同事T姐就教一個既便宜又安全嘅方法，只要係朝早返工前，將個幾蚊雞嘅吸濕器放係被竇入面，棉被最好蓋埋個枕頭，到夜晚放工返屋企，就會迎來一床乾爽枕被。被竇入面會乾爽晒，亦會見到吸濕器入面有水。 佢提醒大家，瞓覺時記得拎走個吸濕器，唔係會吸埋你皮膚啲水份呀，佢自己瞓覺時就會將個吸濕器放喺一個小膠盒入面，第二朝再拎返出嚟用。香港咁潮濕，隔一排就要更換吸濕器㗎啦。 香港家務助理總工會主席謝飛燕就指，佢自己未試過將吸濕器放上床，但以佢多年經驗，教大家另一方法，就係將電暖毯放係床上面，再蓋上棉被，開著30至60分鐘後關機，被竇水份會被揮發，即刻乾爽晒。佢話一直教啲老人家咁做，對於有風濕症嘅長者特別有效，如果覺得天氣太熱，可以攤凍將床一陣先瞓，個乾爽效果仲係度嘅。 費清  朝早離開床舖後，就可以將吸濕器放上床，之後再蓋上被，夜晚返屋企，枕被都會乾爽啲啦。(蘋果日報) |
||
|
|
|||
歡樂香江
