老實講，我地喺準備呢個專輯嘅時候，都覺得好頭痛，因為香港嘅精神健康服務唔成熟，資源分配無清晰嘅藍圖，所以行業之間分工不清，服務有好多重疊位，而看似相關嘅行業多到眼都花。再者，雖然有啲專業（例如精神科醫生）接受過深入嘅精神科訓練，但執業時礙於現實限制（例如係政府醫院要「秒殺」求診人士），服務往往不盡人意；相反，有啲專業（例如社工）嘅訓練雖然唔係特別針對精神健康，但由於接觸大眾機會多，唔少會自己進修有關知識，因此成為很好嘅服務提供者。所以呢個專輯只可以介紹一下唔同行業本身嘅角色係做啲乜嘢（恕今次未能將市面所有行業一一盡錄，今次主要介紹响政府機構主力負責精神健康嘅行業），至於實際情況如何，或者個別從業員自己進修咗啲乜嘢心理治療或輔導課程，係咪有資格提供相關治療等等，服務使用者不妨主動問清楚對方嘅培訓同資格。如果唔舒服想搵人幫手、尋求協助的話，可參考之前嘅post：
《有關精神健康服務的常見問題》
https://goo.gl/yXAL3Z。
另外，唔係每個專業都有註冊制度，冇註冊制度嘅行業就冇法例監管，即係話任何人都可以自稱為該行業嘅從業員，訓練同質素會好參差。面對冇註冊制度保障嘅行業，服務使用者需要仔細了解該學歷嘅認受性，甚至要求對方出示學歷證明，以政府機構認可嘅標準為基礎。
參考資料:
1) 職業字典 http://yen2.hkfyg.org.hk/jobtionary/
2) 香港成年嚴重精神病患者個人化復康支援服務框架https://www.ha.org.hk/upload/publication_42/513.pdf
