買樓不是買棵菜，無奈總有買家墮入陷阱。消委會總幹事黃鳳嫺表示，回歸至今，對於消費者而言，物業買賣樓宇已有很大改善，特別是2013年《一手住宅物業銷售條例》實施後，買家獲得不少保障，惟當中仍有待改善。她娓娓道出，至今仍為人詬病、損害消費者權益的四大買樓陷阱：

1：唧牙膏式賣樓
一手新例前，發展商開賣新樓盤，雖然提供價單，但只取部份單位出售，並非全部，令買家感到混淆，唔知道邊啲賣，邊啲唔賣。發展商睇住市場承擔能力，樓盤是否受歡迎，從中更改價單，在商言商，我哋明白，但咁容易造成假象，造到樓市氣氛好似好熾熱，令人覺得唔買唔得，錯過今次機會就買唔到樓，令樓價越炒越高，對消費者不利。這方面，今日仍然有待改善。

2：認購登記數字發水
「買樓需要登記，數字卻發水，例如幾個人認購，原來是全家人加起來去抽一個單位。以前甚至乎經紀幫客入票，當時唔使申報，令到認購數字容易發水。數字發水，營造熾熱氣氛，造成羊群效應，大家不斷去追去買，唔係經過理性考慮，或者比較不同樓盤而去決定買咩單位。今日發水票的問題稍為改善，起碼經紀登記是需要申報。今天仍然有不少新盤是全家總動員認購，例如一家四口，人人入兩票，總共8票認購1個單位。

3：銷售資訊為人詬病
銷售資訊多年來為人詬病。當年最多爭議莫過於實用面積。2013年實用面積計價未實施前，咩叫實用面積，坦白講，好多版本，業界無統一定義，各有各講，搵把尺去度，原來不同樓盤有不同的實用面積定義，消費者好難作出比較。

另外，銷售資訊好多形象化，令買家有憧憬，附近將來會做某啲設施，但因為城市規劃，設施隨時取消，對消費者而言不是好事。最記得有位買家，他是退休人士，想層樓附近有圖書館、康樂設施，見到樓盤隔兩、三街將會興建呢啲設施，好高興買咗呢個樓盤。隔兩三年，遲遲未見動工，點知原來已經改咗做住宅，好失望，當初一心諗住搬入後，可以享受呢啲設施，覺得被人誤導，最終向消委會投訴。

4：延遲交樓
目前一手新例仍有漏洞，例如延遲交樓。目前發展商經認可人士批准，可以按不同理由延遲交樓，例如天氣、工潮等難於控制的因素，然而卻沒有提及，可以延遲多少次，現在就像可以無限期延遲交樓，其實是否對消費者最有利呢？未必是。外國不是這樣做，消費者獲可賠償，透明度高好多，香港可以仿傚。

記者：陳家雄