其實認識我嘅人都知,我主張港中分家,除咗因為同中國人相處適應不良之外,更大原因係避免 香港人 同中國人之間嘅族群衝突,造成長期緊張。而HKUPOP最新嘅身份認同調查,得3%都唔夠嘅29歲以下年青人認為自己嘅身份係中國人,呢件事更加反映,港中分家好可能至係和平希望。
香港人 身份牢不可破
張曉明呢啲共產黨人,認為由細到大洗腦,可以製造一班認同中國嘅人。中國經驗可以成功,因為中華民國喺共產黨當政前都係獨裁政府,無普及教育,民智未開,亦無言論自由,加上文革殺好多人,至可以咁得心應手,但香港有普及教育,有資訊自由,有國際條約保障,你中共越係玩嘢,年青人越反對,再加上依家佢地同受共產黨洗腦啲中國人火星撞地球,造成依家呢個局面。依家香港係1965年8月9日之前嘅新加坡同馬來西亞,好多人之前話我危耳聳聽,依家有晒數據證明。港獨無錯係你班中國人接受唔到,但如果港中分家可以對中國有益處,點解唔港中分家,正如新馬分家,東姑拉曼係計啱數,對馬來人鞏固對馬來西亞聯邦控制有利,至會做出呢個決定,而呢個決定,毫無疑問係一個正碓嘅決定嚟。
依家既然係咁,當中我個人認為最佳方案,係中國主動同英國傾,喺英國暫時接管嘅情況下實現港中分家,點解我咁講,因為依家香港唔似1965年8月9日嘅新加坡,有一個可以代表新加坡人嘅政府可以暫時接管政府,而有能力應付期間嘅混亂局面。如果俾熱普城呢班假港獨搏懵成功,香港隨時衰過共產黨管治。俾梁振英呢啲人渣挾持個新國家,又係死得人多。泛民又缺乏呢個管治意志,而本土派同獨派,又本身面臨人才不足嘅問題,所以暫時由英國接管,喺一個時間表下舉行幾屆自治政府大選後,至決定國家前途,係成為香港自治領,繼續同直布羅陀同等地位,定係香港共和國,由當時嘅人決定,相信屆時我已經係一個白髮蒼蒼嘅老人家。
但可以肯定係,年青人已經形成香港係自己嘅祖國意識,如果唔港中分家, 香港人 同中國人嘅血海深仇累積落去,將會搞出大頭佛。