話說早兩日朋友聚會，其中一位抽中頭10號碼之內（好似係白核排18xx)，同我地講話會揀梅窩（因為計過彩興應該無佢份）。期間問我呢個前梅窩人究竟衣食住行各方面係點，了解完佢之後叫佢唔好FF太多（因為好多野同佢想像中差太遠），最後當然有點不歡而散啦，既然有佢一個嘅話，即係仲有好多人對梅窩許多不清楚。而家從幾方面講番，希望幫到你地（當然我唔會重覆師兄師姊果啲一世人得一次機會嘅論調）
1. 交通
一係中環坐船，一係東涌坐3M巴士
船：
http://www.nwff.com.hk/route/get...nu_num=3&lang=zh-hk
船有分慢船同快船，快慢船比例通常係2:1，快船航程35-40分鐘；慢船航程50-55分鐘；繁忙時間最快20-40分鐘一班（但呢個情況通常係慢船嘅下一班係快船），非繁忙時間通常係一小時一班（甚至多過）。
最頭痕係你嘅返工放工時間夾唔啱船期，撞正隻慢船，起碼多50%時間先返得入嚟（或者出得返去）。
巴士：
http://www.newlantaobus.com/route/detail/6
相對嚟講，巴士個班次密啲（繁忙時間10-15分鐘一班、非繁忙時間差不多1小時一班），但係當快船出到中環，巴士只係去到東涌（車程40分鐘），之後再要轉地鐵出去（除非你響機場或者東涌返工）
至於票價方面，船係有月票，但只係包慢船基本位，快船同豪華位要補番差價，而且因爲假日票假會比平日貴（無論巴士同船都係），所以補嘅差額會幾大吓。仲有，船月票每日只包一次來回，唔可以一日坐幾程。
最後，無論你係坐車或者坐船返梅窩，記住你係灰姑娘，12點幾係最後一班。所以想玩夜d嘅，一係唔好諗，一係就諗住玩通宵，坐6點幾早班船/車返
另一件呢幾年嚴重左嘅事係多左好多人假日入嚟大嶼山（當然長洲更加嚴重），攪到有時想番入梅窩/出番市區都要等多一兩班巴士（尤其係有啲行山露營隊一行二十幾三十人已經坐左架巴士嘅一半）。
至於唔坐巴士同船，自己揸車嘅話，有幾樣野要注意。首先，要去申請禁區紙。因為東涌道以南係禁區，無禁區紙會被檢控（同西貢北潭涌以東地區一樣）。其次，梅窩無咩車位，成日見d車周街泊，雖然通常都唔抄。
另外，嶼南路同東涌道係單程單線來回行車（比以前東涌道要避車已經好好多），有咩東瓜豆腐就寧願揸番架車返梅窩坐船出去好過。最後係個距離，出東涌16公里、荃灣40公里、尖咀46公里，自己要計下個油錢同損耗（因為東涌到梅窩係上山落山路為主）
講漏左的士呢樣野，基本上可以唔講，因為全大嶼山只係得50架，所以基本上唔call係唔會有，至於至call當然就要⋯（你懂的）
大致講完交通，下期講下其他嘢
