回應 SLLAM
點樣使用先叫平等？
50686345 發表於 2018-02-11 21:15:04 原文
喺講點先叫平等之前，先講咗點解土地使用權要平等：因為土地係自然形成，冇任何人付出過勞力就已經存在，所以道理上人人都可以平等使用。呢個可以理解為人人都有相同嘅免費配額使用土地，例如每人3平方米 （對於住多層大廈嘅人，呢個土地面積已足夠，因為佢可以變成幾十倍嘅樓面面積）。市民買樓，只要佔地少過呢個面積，就可以免付地價，只需付建築費。
當然，以絕對嘅角度講，上述嘅做法都未算平等，但起碼佢讓市民可以行使自己嗰一份嘅土地使用權，唔似得而家咁，有人成世做生做死都冇使用權，有人坐喺度乜都唔使做，使用權竟然越來越多。
如果你對呢個做法覺得奇怪，可以諗下郊野公園嘅例子。我哋使用郊野公園土地做任何活動，無論燒烤，行山，影相，都唔使畀地價啦，點解使用住宅用地嚟居住就要畀地價呢？可能你會話住宅用地比郊野公園土地供應緊張，所以要採用收費方法嚟分配資源； 但如果有一日，想去郊野公園嘅人變得好多，咁莫非政府就要：1. 圍起晒所有郊野公園，只設特定出入口，2. 向入場人士收地價，3. 容許炒賣入場劵？
現實中，郊野公園嘅使用情況並不緊張，但政府依然實行一些措施，保障每個市民可以有平等的權利使用郊野公園，例如禁止採摘/捕捉並帶走郊野公園裡面嘅動植物，以保持佢原來嘅面貌。
咁對於使用情況緊張嘅住宅用地，政府係咪更加應該用措施保障每個市民嘅平等使用權呢？
