競步賽好多人都會有一個疑問，點解競步好像同跑步差唔多，但喺就唔算跑步呢？原因在於競步同跑步兩者有動作上嘅差別，競步喺用步行嘅步態週期，如果用咗跑步週期會當犯規，用增加完成秒數作為罰則，雖然跑步比賽都可以用行路方式完成，不過真正跑步的話每一步都係一個跑步週期，咁跑步週期包含咗咩元素呢？

跑步週期一共可以細分成四個小週期，著地期、支撐期、提腿期、騰空期，上面四個小週期都帶有唔同嘅功能，同一般步行最大分別莫過於騰空期，每一個時期所使用嘅肌群都有所不同，以下再一一詳細講解．

雙腳離地之後，腳再次接觸地面一刻稱為著地期，坊間有唔少討論研究著地一刻，應該用邊一種方式，當中存有好爭議，而每一次著地都代表完成左一次跑步週期，著地期係跑步週期當中有舉足輕重嘅地位，一個技術良好嘅手能夠減低著地一刻嘅能量損失，每一步都唔會令身體慣性降低。

跑步時身體會向前移動，而著地腳會向後移動，直到提腿前一刻。支撐期顧名思義係一個用於支撐身體作用嘅階段，基本上依一個時候腳只有支撐功能，同時利用身體嘅慣性作為向前移動動力。

支撐未期腳已經移動到身體後方，當用力向後蹬一刻就正式轉換到提腿期，而提腿期一刻會有兩個動作，後蹬係一個動作，另一隻腳會同時向前跨步，整個跑步週期最費力氣嘅時刻就喺提腿期，依個時候會決定你嘅步距，後蹬力愈大，步距就會愈大，不過同時會耗用大量能量，所以一般長跑唔建議使用太大步距。

雙腳離地一刻，表示一整個跑步週期即將結束，身體會利用慣性向前，保持身體軀幹成一直線，想要減少慣性損失，就必需配合正確擺手，不但有助於換腳動作，更可以令成個動作更合乎人體生物力學。

一個技術良好嘅跑手，可以喺著地一刻將能量損耗盡可能減少，支撐期時保持身體成一直線，保存更多向前慣性動力，提腿期用力後蹬保持或增加向前動能，讓騰空時有更多力量向前，最後騰空期配合擺手動作，再主一步增加向前慣性動力，而上面所講嘅條件做得愈好，變相跑步經濟性會愈好。