• 猶如整個荃灣區般大的粉嶺哥爾夫球場，應否收回土地作發展住屋用途，引起社會熱烈爭議。民政事務局今日（20日）宣布，計劃跟合資格的私人體育會以特殊契約方式續約，徵收三分一地價，變相相關土地或起樓無望。
• 民政局的檢討結果一旦落實，最失望莫過於居於劏房的弱勢社群。劏房戶黃女士4年前離婚後自力更生，獨個兒搬到劏房居住，單是住屋開支，已佔收入超過三分一，申請公屋和單身宿舍仍未有確切回音。她懇求政府和相關人士，體諒住劏房市民的辛酸，考慮收回土地發展，「我想有個安樂窩！」

2）香港遊艇會奇力島會址租約玩到2056年，仲長久過50年不變嘅香港，家陣奇力島會址係咪仲keep 住每年$1,000地租，畀有錢佬會員永續做私人會所？

3）推行私人遊樂場地契約「新」政策前，政府為何一推再推，延遲公布，同時偷偷幫有錢佬會所續期？私人遊樂場地契約由2014年開始檢討，檢討報告一拖4 年，係咪幫拖官商又勾結？

4）局長聲稱推動體育發展，但點解偏袒富豪會所，漠視精英運動培訓？某啲會所對香港體育普及化、精英化、盛事化三大政策方向毫無貢獻，例如香港遊艇會係玩遊艇、開船P，但政府就以推動體育之名，資助遊艇會用每年一千蚊地租、＄0地價，霸晒18,738 平方米嘅奇力島直至2056年；我哋嘅精英運動員，一無獎牌就降班無資助，如果政府真係關心體育發展，點解唔收返遊艇會市價地租，再拎去真金白銀資助運動員，永續體育培訓？退一萬步，政府粗粗哋收返遊艇會時市值地價，已經多3.6億（精英運動員每年開支約4.6億），講到咁撐運動員，最終咪又係最撐有錢佬。

5）政府話要比班有錢佬（係呀，包括有172公頃粉嶺高球場、賣緊千六萬公司會籍嘅香港哥爾夫球會）集資酬錢交新租地價，所以要延遲至2026年推行「新」政策，即係7成半私人遊樂場再續新租前，依然爽歪歪齊cap水，政府仲唔係擺明鬆章？市區重建呀，居民都無八年緩衝啦。政策早於2014年檢討，今年已經第五年，一個二個有錢會所都唔夠時間做準備？

6）收少三分二地價，物有所值嗎？庫房損失億億聲，換來只係將來每個月唔知會唔會多240小時畀合資格外界團體及體育總會代表隊（sorry，一般市民仲仍然無份，你而家無，將來都係無得玩）訓練時數，嘩，圍返埋，所謂開放鐘數，分分鐘貴過局長時薪，政府點解要作賤官地呢？

◤我哋要求◢
￣￣￣￣￣￣
1）對體育發展貢獻有限、圍威喂唔開放公眾嘅富貴會所，政府應盡快收回十足地價，為庫房止血，不願或不能交十足地價，就要取消會員制度，無差別對公眾全面開放。

2）對於不配合上述政策的會所，政府應運用《收回土地條例》，將會所收歸公用，開放畀公眾，並由政府接手營運，這更能貫徹政府體育政策嘅三項目標：普及化、精英化及盛事化，真正惠及公眾。

3）喂呀，取消私人遊樂場地契呢啲「體貼」富豪嘅特權政策，已經係社會共識，政府「土地大辯論」唔駛審都應該順應民意，還地於民啦！