【公屋劈價】街坊:經歷兩次樓市爆煲 今次唔似97翻版
黃大仙東頭(二)邨一個實用面積439方呎中層單位,上月以未補價售出,成交價180萬元,呎價僅4,100元,料低市價四成,呎價屬屋苑逾兩年新低。
街坊林先生表示,東頭邨位於市中心,鄰近摩士公園,曾經出過公屋王,唔出奇!市區地可以起樓,鳳毛麟角,香港人習慣市區,就算住新界都是來市區返工。無辦法,供求問題,愈稀罕咪愈貴。
對於有屋邨單位低市價成交,被問樓市是否轉勢。他表示,「呢個正常既,美國搞緊貿易戰有影響,三大經濟支柱貿易、地產及股票,特朗普搞啲關稅,第一,搞死企業家,無生意做,影響慢慢會浮現。雖然自己唔係經濟專家,但經歷幾次經濟上落,亦都係97年人人中招既年代賺錢。個陣同親戚做地產代理,跟住無做啦,我係傳奇人生呢架!而家做物業管理,有飯開囉。」
目前樓市像不像97,他回應:「有人會咁講,睇下領導人點做囉。土耳其、阿根廷、印尼貨幣出現危險,但無一個好大既牽引,令佢突然爆得好犀利,暫時見唔到,應該就唔係97翻版,只係靜下。通常爆,係好犀利,係好過熱,一下子咁來或者好突發咁來。都經歷過兩次,除非有啲好突發既事,例如刺殺行動。其實就唔會,好多人有風險管理。目前樓市回一回係健康,叫啲人冷靜返,唔好咁癲!」
此外,東頭邨蚊多,街市好少檔口開檔,買餸都要去樂富,行要十幾分鐘。