回應 #31 杏子
我自己會咁睇一個人未來有無買居屋的需要:
1. 將來預計收入
如果你本身係有學歷,ON THE TRAINING FOR PROFESSION或者係公務員如穩定而MAX POINT係超過50K一個月,我會建議你考慮一下。
如果你本身從事的工作唔太穩定的話,或者收入係以佣金為主就真係要想想,俾你買到冠德苑都供唔起。
2. 年紀
如果你係35歲以下而有穩定收入的話,值得考慮,因為你有25年供樓,每月供少D
如果你超過40歲,你的供樓年期少於25年,每月供樓同相關收入支出佔月薪更大比例,每月都吃緊都不易
3. 家庭組合
如果你係長者的獨生子女,當然要考慮一下你既要考慮自己的負擔能力,亦要考慮日後的父母醫療費用,同埋如果其中一個係業主,你父母除了長生津之外就咩福利都申請唔到
如果你有結婚打算,而配偶同意與你父母同住,而佢有一些原因加唔到名到你的公屋度,例如佢係私樓/居屋業主,或者有機會繼承父母的私樓/居屋,佢係另一間公屋戶主,或者佢既資產或收入都有機會令你家庭變成富戶,我就建議你考慮一下趁未婚時買樓了,因為你父母去世後,如你已婚都未必符合資格成為單位新戶主。
如果你係公屋戶籍既唯一一位下一代家庭成員,而你現時居住的公屋單位是超過30平方米,你就考慮一下如你父母去世之後你接受到搬去最多19平方米的單人單位了。
另外你亦要考慮一樣野,就係如果你兩老留低的錢是非常富裕,甚至遠超過現時富戶政策下一人計算資產上限(2019年單身人士資產上限為1,180,000)而你係獨生子女的話,你要考慮一下如果你繼承左呢一筆錢之後會否令你間公屋都無得住,但是,呢筆錢又未夠你係居二市場或者私樓做首期買樓。
4. 是否有心儀居屋/非常不滿現居單位
有些人申請居屋,主要想改善居住環境,由細屋搬大屋的,低層變高層,新界轉市區(呢個最多)
有些人申請居屋係因為有家人親友住新居屋附近方便照應。
有些人申請居屋係睇中佢既升值能力,你睇而家景泰苑三單成交都比購入價升左接近一倍,有些人佢本身有居所,呢個真係千載難逢的中六合彩的機會。
未來的新居屋重鎮,主要係東涌,粉嶺,安達臣,啟德。將來在市區同擴展市區甚至屯門元朗的居屋都係單幢式,小型屋苑(即兩幢起三幢止)為主。過左預期在2021開售的鑽石山啟翔苑同北角單幢居屋外,都未有令人心動的市區居屋出售了。
當然,最重要的是要考慮自己現在與未來的負擔能力,如果你預算係100萬內完成首期、印花稅、裝修、雜項的話。我相信以現時市況除了由房署購入的租置單位,就只有新居屋先幫到你。如果你真係自知能力有限的,繼續住公屋會比較好,因為曾享用房屋福利的人係唔可以再申請公屋的,除非係破產,離婚而法院出售該居屋,或其全部或部分業權,申請綜援。
