VICK, 你依家呢種情況同感受我絕對明白. 我爸爸本身平時好少病痛, 身體健康. 到02年冬至有事都無任何先兆. 一有事既時候, 醫院係話佢中風. 不過當時行得走得,住左幾日醫院就返左屋企, 後尾到新年前入院話佢再中風. 當時已經半邊身唔郁得. 憑佢自己意志. 都可以企得起身行下. 由02年冬至到03年SARS期間. 每次跌一跌, 為穩陣起見都會入醫院check一check, 當中包括做腦掃瞄. 不過每次都係話無事. 後尾我開始發現佢連講野都有問題喇. 再入醫院做腦掃瞄都係無事, 就去做磁力共振啦. 結果發現腦裡面有個淋巴瘤. 大到非割不可喇.
我當時都心諗點解之前無先兆, 個瘤既然咁大, 點解做腦掃瞄又掃唔到. 發現既時候已經係非割不可. 最衰當時已經係SARS既高峰期. 唔割又話唔得. 割又驚佢身體弱中SARS. 當時都唔知點好. 不過醫生當時都話我地唔簽紙, 佢地都會照做呢個手術. 咁為有搏一舖囉. 最慘係果段係SARS期間, 就算做左手術都唔準探病. 我爸爸當時一個人要o係醫院挨左兩個月. 湯水都唔多啖補下. 最終憑佢自己意志同我地屋企人既支持. 都同我地o係屋企過多幾年先離我地而去.
我係度share我呢d既過去. 係想你知, 我絕對明白你依家既感受.
另一方面係希望你明白, 家人突然有病. 周邊好多人都會傷心難過. 不過你自己首要係盡快接受. 嘗試搵唔同既方法醫治, 唔好氣餒. 因為病人都唔想見到你地咁樣. 佢同你其他家人都好需要你既支持, 唔係佢地自己都唔會積極面對.
可能講得唔好, 請勿見怪.
最後祝你家人早日康復. 你自己都要休息多d, 佢地好需要你照顧架.