我係C座街坊呀，因為屋苑事都係父母理多，但最近收到房署就管理公司續約嘅意見調查，真係不吐不快

作為一個從事緊物管既行家，我想同大家講，無論你鐘唔鐘意而家做緊嘅 *管理公司*，都 *一定要填*

首先，按法例要求，預期合約總額超過$20萬嘅合約，都必須進行招標，除非於業主大會上通過唔招標而選擇同現有服務供應商續約，否則必須進行招標。一般管理合約會係到期前6至9個月就要開始招標，而我哋屋苑新管理合約由2021年4月開始，所以房署收完今次調查問卷，其實有責任盡快開始招標程序。

如果你對而家管理公司  *唔滿意* ，填左招標，咁梗係有機會換公司啦

*就算你好滿意而家既管理公司，你都一定要填安排招標*
因為管理公司好簡單！
續約，冇競爭對手，我一定話呢度唔夠，果度唔夠要加價，好似我地同期定對上一期d居屋，*一續約已經加咗15定20%管理費*，但你有招標，房署一定要價低者得咁入標*除非你同管理公司有親，否則你等佢重新用個靚價入標。經理、主任、保安員人工幾多，管理公司都用公價計數。

至於下面既細節問題，容許我講兩句，大家岩聽就聽。

合約年期就2年好過3年既，除非你有單大型維修工程要做2年以上要管理公司跟住，否則2年約，就算管理公司玩野，做得唔好，你都可以快趣唔續約，換另一間。

至於每日三更8個鐘定兩更12個鐘，就好睇業主想請d 咩管理員。正常屋村就鐘意返8個鐘，特別早更d姐姐收工可以買餸，多人鐘意做，咁係容易請d好員工既。但同時要考慮人工支出嘅問題，以一個8個鐘保安崗位去計，每月$11,000人工一個人，3個人即$33,000一個月，而12個鐘保安人工每月$15,000人工一個月，2個人即$30,000一個月，所以12個鐘嘅保安，人工支出理應較8個鐘少，從而對加管理費嘅壓力都少啲，始終一個屋苑，最大嘅支出就係人工。

*我想特別提一提，換管理公司唔代表要換埋前線職員* ，大部分嘅管理公司係接手一個屋苑時都會盡量留返舊保安員喺到做，除非業戶覺得班保安做得好差，否則多數都會留嘅，始終而家請人難。我問過我父母，佢地話樓下d保安都幾有禮貌，有時驚填份表換管理公司會影響佢地。所以我更想特別提提大家，換管理公司唔等如換埋前線職員，大家唔使擔心保安員生計。

至於最後一題「加強保障非技術員工雇員福利」條款，其實等同約滿酬金，你揀咗贊成，到管理合約約滿管理公司就會按人頭同我哋收每個員工6%人工當約滿酬金，咁樣屋苑嘅支出又會加大咗，只會係對加管理費做成壓力，比多一個藉口管理公司加管理費，不過有人又覺得係社會責任應該俾，所以大家更加要填好份表，表達你係咪願意俾呢份錢就OK。

希望呢篇文可以借你地個page出，唔好意思唔方便出名，因為做緊呢行，有利益衝突唔方便講太多，但我父母係業主，希望大家俾管理費係俾得合理！

各位一定要表達意見。
是好事來的啊

多謝你寶貴提出，好中肯，最少我睇哂都唔覺得你有偏頗意見

夠曬透明度高， 唔係為咗自己想做的事咁樣踩低人。

好

勞工處招聘；8個鈡保安人工9千幾，12小時保安大約1萬2千

不吐不快⋯⋯