居屋2019時我做過一次紙上談兵, 然後除咗何文田(因為自己一定無份)之外, 每個屋苑行一次進行評價
今年照辦煮碗先黎一次紙上談兵, 評價四個新屋苑, 不過去唔去晒四個新盤... 就睇下有無咁既心力啦, 因為我今年白核第八粒珠, 無得揀機會好大, 將目標放去有基本裝修私樓好過
以下5分為最高分, 0分為最低分
評分標準:
交通：純純睇離鐵路站距離, 至於搭車去邊度要幾耐...呢點好個人, 唔係評分指標, 自己加減喇
配套：購物方唔方便, 其他都唔重要
環境：有無景觀, 嘈唔嘈之類
校網：其實我唔係好識, 今年刪除呢part
鑽石山啟翔苑
交通：無得輸, 簡值可以叫地鐵站上蓋, 5分
配套：荷里活廣場就喺隔籬, 咁大個商場, 唔高分都唔得, 5分
環境：東西都係地盤, 短期內麻麻地, 不過... 啟翔樓花期都唔短, 到時可能好好多
附近工廠唔算好高, 向南北高層單位開揚既, 低層就差咁啲, 3.5分
火炭彩禾苑
交通：就售樓資料簡介張地圖黎睇, 連地鐵Logo都見唔到; 要靠附近有駿洋邨, 有巴士出入沙田站
今日由彩禾行到火炭站, 盛惠18分鐘, 建議都係搭巴士啦... 靠火炭站就0分架喇, 沙田架巴士加返啲分, 2分啦
配套：近住大屋邨就會有商場, 生活所需應該唔成問題, 已經開咗酒樓, 餐廳, 面包店, 連鎖護理用品店, 好快會開超市, 會有街市... 典型屋邨商場, 乜都有, 係無選擇; 不過講真, 彩禾行到駿洋商場都有點小距離, 3分
環境：背山, 清幽, 寧靜, 5分! 但係... 面句工業大廈果邊減一分, 而且隔離條蚊坑村真係無改錯名, 淨係駿洋行到彩禾已經被咬兩口, 扣1分, 3~4分!
馬鞍山錦駿苑
交通：同上, 地圖見唔到地鐵站, 只見到山墳... 睇google map... 好聽啲係兩個地鐵站中間, 唔好聽係行去邊個站都唔近... 不過睇落就無火炭咁遠既, 3分啦
配套：向北欣安邨有商場, 向西錦泰苑都有商場, 唔算遠, 但商場大細就唔知喇, 3分
環境：一邊面向高速高路, 一個嘈字, 減兩分, 但高層可能望到城門河景, 加返一分, 4分, 另一邊向山, 5分, 但佈滿山墳, 減半分, 4.5分, 整體上 3~4.5分
軍地山麗苑
交通：軍地?! 咩地方黎, 我諗好多人聽都未聽過, 唔好話份簡界見唔到地鐵站, 連Google map都要縮幾下先見到地鐵站
巴士... 始終大屋苑, 隔離有皇后山邨, 好可能會有既, 不過暫時就未知之數喇, 依家入去可能都係靠經聯和墟架小巴, 然後再行一大段路... 0分, 未來可能升到上2分既...
配套：識人住軍地村, 想買野呀? 有士多仔既, 唔岩呀? 搭小巴去聯和墟啦, 1分
環境：清幽, 寧靜, 過猶不及; 不過始終單位多, 又開發中, 相信會改善既, 現時2分, 再上2分期待分, 2~4分
以上評分希望幫到大家揀樓, 歡迎參考, 更歡迎加入自己意見去評價
更重要係「揀樓前請自己實地視察, 唔好信晒網上言論, 包括我所講既野」, 我並不可信
然後最後一點：揀樓前請自己實地視察, 做足功課
