工廈食肆愈開愈多,部分環境衛生惡劣,成為老鼠樂園!《蘋果》接獲報料,指觀塘凱源工業大廈一間餐廳近月遭老鼠攻陷,曾在該餐廳任職廚工的阿Ken指「最高紀錄一晚捉7隻」,不但半排雞蛋被咬爛偷食,連即食麵、調味料、麵粉均無一倖免。該工廈五金舖和茶餐廳亦指不時見鼠蹤,惟有將窿窿罅罅密封,防止老鼠闖入。
「我做過咁多間餐廳,都未見過咁多老鼠!」在凱源工業大廈一間餐廳任職僅一個月的阿Ken指,甫上班已令他感到震驚:「我哋自己食飯都食到老鼠屎,日日開工好似奏緊交響樂!」老鼠家族更不時在頭頂的橫樑上走來走去,又試過走出食堂,嚇得食客驚慌大叫。
收舖後情況更嚴重,老鼠幾乎反轉廚房,一箱箱的雞蛋被咬爛,「佢哋(老鼠)咬爛個紙箱捐入去,咬爛啲蛋,搞到啲蛋汁流晒出來。」阿Ken表示,老鼠不但愛食雞蛋,更愛食即食麵,「成個麵食剩一啖」,牠們還喜歡玩麵粉,弄得廚房一團糟。每天上班,職員更要用吸煙機到處吸走老鼠屎,「成地都係,掃餐死,啲枱底凳底全部係老鼠屎!」
阿Ken坦言,餐廳老闆已聘請滅鼠專家幫手,買來一個個大型膠箱,將食物存放入內,然後將店內一些大大小小洞口截塞;此外,收舖後就全店放「老鼠膠陣」活捉老鼠,更拍下膠板黐滿老鼠的相片。他認為,鼠患來自大廈,由於該餐廳位於一樓,鄰近天井,成為老鼠溫床。
《蘋果》記者到該工廈了解,發現位於1樓的餐廳對開10呎,放了兩個大垃圾桶,讓附近店舖丟棄垃圾,而旁邊一個凹位相信用來放置大型垃圾,衛生環境略差,但未見有老鼠或曱甴。
餐廳公關Jerry表示,餐廳開業兩年,惟近幾個月確實出現鼠患問題,尤其在廚房輸送食物的位置,故每晚收舖後會放置老鼠膠,並安排滅蟲公司每周前來一次,進行大清潔及滅蟲,同時,餐廳員工亦一天多次進行清潔,尤其是廚房的窿窿罅罅。Jerry指,現時情況已受控,叫食客放心。餐廳員工則指,鼠患最嚴重是一、兩個月前,懷疑與樓上有裝修工程有關,「可能迫咗老鼠過來,老闆一發現已call滅蟲公司,現時廚房日日洗,洗完才交予下一更同事,亦換了幾間滅蟲公司,每周來一次,呢排老鼠膠板都黐唔到老鼠。」
毗鄰一間五金店的老闆黃生亦指,早排亦見過老鼠出沒,「夜晚見過一兩隻,牠們周圍走,唔知從哪裡來,惟有用老鼠膠痴佢哋。」該工廈地下的美味軒餐廳經理潘女士指,餐廳開業一年多,初期都見鼠蹤, 「開初有,找滅蟲公司每周檢查,都OK,現時封晒啲洞隙,防些老鼠走入嚟,現在一潮濕就有蟑螂,亦間中見有一隻半隻老鼠,在工廈都算正常,我哋已找滅蟲公司幫手。」