回應 #26 tungtang
首先要搞清楚啲概念。「業主立案法團」係透過「第344章《建築物管理條例》」成立嘅業組織，由業主夾份自行管理屋苑公用地方，概念來自有限公司。成立「法團」係單程路，成立咗就冇得取消。你可以想像「法團」類似係一間可以換人，但不能執笠嘅公司。
屋苑嘅每個業主都係法團嘅成員，喺嗰度有投票權，可以參與屋苑管理上嘅決定。不過由於有啲事務較瑣碎，如果每次都透過業主大會叫所有業主嚟投票就太費時失事，所以喺成立法團後要同時成立「管理委員會」，委任少數嘅業主代表整個法團執行日常事務。根據法例，擁有 100 個單位以上嘅屋苑，「管理委員會」需要至少由 9 人出任，任期為兩次嘅「業主週年大會」(即大約兩年)。
「管理委員會」被授權為所有業主做較簡單嘅決定，例如銀碼少於 20 萬，或低於屋苑每年開支預算 10% 嘅採購。至於較大嘅決定，仍然需要放上業主大會，由所有業主投票議決。
委員做得唔好，要搞清楚係指委員做咗違法嘅事、定係表現未如你想所。如果係違法，則請報警，或報廉政公署處理。如果只係覺得佢做得唔好，據我所知目前法例並冇授權業主可以喺任期之內解僱委員。由於委員並非受薪嘅議員，佢哋只係義工，代表業主處理日常事務，如果好容易被擺免，大概冇人肯做㗎啦。比較可行嘅方法係兩次「業主週年大會」之後由其他人去選，成為委員，參與管理及作出改善。
最後提多一樣，既然目前麗翠苑嘅「管理委員會」提及有房署睇住條數大家可以放心，咁我相信房署仍然係麗翠苑嘅「經理人」。如果係嘅話，目前所有管理上嘅事務仍然係應該由房署負責，「管理委員會」喺「法團」未成功解僱呢位「公契經理人」之前仍然只係花瓶。如果覺得屋苑帳目不清，有證據就應該去廉政公署舉報房署，我相信佢哋會好有興趣呢單案件。
