日圓係咁跌，呢個暑假睇怕喺日本一定勁多香港人。如果經羽田機場搭內陸機去北海道等等，可以試用吓日本最新嘅自助行李寄艙機。
全日空ANA月初喺羽田機場，處理內陸航班嘅Terminal 2，新安裝咗5部自助行李寄艙機(ANA BAGGAGE DROP)，乘客可以唔駛經櫃位地勤，自己將行李寄艙。
輕觸式屏幕可以揀日語、繁簡中文、英語、韓語，首先放行李去指定位置，然後喺部機scan下載好嘅登機證，部機就會列印行李標籤，自己貼標籤喺行李。部機會自動關門，咁就搞掂。不過，仲要等一陣，因為部機仲會檢查行李有冇違禁品，如果冇就會顯示完成，否則就會要求你同職員聯絡。
據當地傳媒話整個過程只需要一分鐘咋，去日本真係可以掃貨掃到最後一刻，自己行李自己寄，真係慳得一秒得一秒。ANA話今年之內會增加到39部，仲可能推廣到國際航線。而且，ANA喺今年秋天，所有自助登機系統都會新增繁簡中文、韓文㖭。
不過，話說回頭，大家日後亦都少咗機會接觸地勤。當你拖住個喼攰到死咁撲到機場，唔再可能見到，好似水原希子咁索嘅地勤小姐，同你講聲have a nice trip。
費清
