盲搶蛋！

盲搶蛋！

【on.cc東網專訊】荃灣一間雜貨店，不時聚集大批街坊排隊買歐洲雞蛋，成為區內奇景。最近一則貼子引起網民熱議，「次次行過都見到成村人排隊，我心諗，買雞蛋啫，唔使呀？」究竟是甚麼吸引一眾街坊排完又排，買走一底又一底的雞蛋？有網民指，該雜貨店的雞蛋「大隻又新鮮」，而且更有一般少見的「歐洲蛋」；難得老闆說得老實，唔怕得失客人：「咪又係雞蛋，羊群心理啫！」


排隊買歐洲雞蛋，近年成為荃灣區奇景。


為應付人潮，店主將雞蛋放置最當眼的大門。


店主十分細心，整盤蛋反一反，望一望有沒有爛雞蛋才會出售客人。


一箱12底，一底30隻，一日賣過萬隻雞蛋。


今期主力出售波蘭雞蛋，紙箱標籤無花假。


何先生稱母親想全家吃得放心，才特意光顧這雜貨店。

捲起衣袖，掀起托蛋盒，望一望，合上反轉再睇，無爛，再合上，用繩繞2個十字，「有無環保袋呀？36蚊呀。」又賣出一底共30隻雞蛋。位於荃灣的一間小小雜貨舖，雖然糧油雜貨樣樣齊，但它更像一間雞蛋專門店，專程前來買雞蛋的街坊絡繹不絕，有老街坊更稱：「有時排足半個鐘都未買到！」
甚麼令街坊如此捧場？「我哋啲蛋夠新鮮呀嘛！日日都賣晒，唔會留過夜。」老闆娘王太着記者輕碰一下雞蛋，「嗱！凍架！啱啱喺雪櫃拎出嚟咋！」要數舖頭最好賣的，一定是歐洲雞蛋，「一日都賣到3、40箱。」王太屈指一算，一箱12底，一底30隻，即一日賣過萬隻雞蛋！
踎低又起身，上了年紀的王太把雞蛋、托蛋盒和紙皮箱從舖面與後欄之間搬來又搬去，「今日落過雨，啲盒濕咗會軟，啲蛋好易爛。」細心的王太蹲在門口，一邊撿拾地上的紙碎一邊唸諗有詞，「街坊覺得你老實就自然會幫襯你囉。」的確，不少頭髮花白的公公婆婆手拖手來捧場。
旁邊五金水電舖的老闆則謂，「佢哋喺呢條街30幾年喇，平時都係個仔、新抱同王太看舖，日日都咁多人排隊。」兒子王先生則解釋，一直都有賣歐洲雞蛋，「只係近4、5年先hit，一個傳一個，羊群心理呀嘛，見人排你又會想排，歐洲蛋喎，呢排賣緊波蘭蛋，之前有賣過法國、葡萄牙、荷蘭蛋，可能啲人聽落覺得矜貴啲啩。」
對於在網上世界揚名立萬，王先生一家人卻面露愁容，「平時20幾人排隊，再多啲人嚟我哋做唔切真係唔知點算！」王太則說，「人哋點讚係人哋嘅事，萬一其他人嚟到買完唔鍾意咁點？」不過一眾街坊一於少理，繼續排隊直至「天荒地老」。
歐洲雞蛋受街坊歡迎，究竟與其他雞蛋有何分別？為母親買雞蛋的何先生指，即使大陸蛋比歐洲蛋每底便宜10元都不會考慮，「媽咪平時光顧呢度，想屋企人食得放心啲。」然而「歐洲蛋」是否只此一家？記者到附近街市尋找「歐洲蛋」的蹤迹。
有乾貨店老闆娘表示，一般雜貨店都不會購入歐洲蛋，「咁遠運到嚟，好多時會發霉，或者污糟，又要洗又要抹。」結果4間乾貨舖中，只有1間有出售德國蛋。香港蛋業商會理事長楊金炎指，業界購入不同產地的雞蛋主要視乎價錢和供應。
「西方國家遇着感恩節或者聖誕，供應會緊張，價錢都偏貴，高峰期過後就會平番。」他指，雞蛋的級數主要視乎質素及新鮮程度，「大陸蛋其實會新鮮啲，夠近呀嘛！味道嚟講就好主觀嘅，不過都要睇吓隻雞食咩啦，特別配方咪可以賣貴啲囉！」不過他不諱言，各種蛋味道相距不大，營養價值相若，「其實都係蛋白質啫。」

哦，好食啲

回應 #3 我是傻的别怪我


    崇洋心態！

回應 #4 我癲的唔好攪我


    係白痴

tm010996hr

波蘭都有出梅林牌午餐肉
係咪又好放心呢!!!!

missyou

jp_dannywong

lamchauho

好過Made In China

回應 #9 lamchauho


    你點知唔係？