曾經支持領匯上市嘅議員，都難辭其咎

folee0001

曾經支持領匯上市嘅議員，都難辭其咎

其實當年把公屋商埸車位以領匯上市，已經知道終會有此一日，早就講咗必然會如此。不論當時那些政府官員講到天花亂墜，作出種種保證，最終都只會係廢話。一旦成為上市公司，便大條道理，以「為股票持有人爭取最大利益」為己任，天經地義，順理成章，有乜好爭拗？當時講，冇人理。仲俾人話你阻住人發達。領匯上市之後，已經逐漸改變其策略，也刻意淡化當時承諾過會承擔嘅社會責任。以「資產提升計劃」的名義改造商場，將原有的小本經營屋村小商戶邊緣化，推向最山旮旯嘅位置。有社區服務性質嘅但係賣相與商場格調不協調嘅，例如屋村醫務所，就在續約時重新發配至最不方便嘅地方，例如停車場旁邊，或者廁所隔離。

站在領匯立場，梗係最好租俾那些大型連鎖經營商。除咗租金及格調的考慮，只有啲大型嘅經營者先至可以方便領匯同佢哋傾「分成租金」，即係除咗基本租金之外，可以根據營業額抽取利潤分成。大户品牌有招徕價值，亦樂得商場業主肯做推廣，最緊要係生意做大，也可順勢踢走小競爭者，呑併其市場份額，擴大市場佔有率，所以亦唔介意互惠互利。結果咁就形成一個新的運作循環，一個屋村商場新秩序。趕絕社區經濟，歡迎壟斷資本。這完全與政府當時口頭所謂的發展社區經濟背道而馳，再一次說明政府口講一套，做就另一套。或者是自己用左腳，蹺自己嘅右腳。領匯就話之你，更加著力提升商埸格調，寧願要Starbucks，唔要咖啡室同冰室茶餐廳；寧願將街市改為超市MegaStore，就係要趕走晒那些個體濕貨小販。咁做，就更多大型連鎖經營及大戶願意入領匯的商場，這又令領匯有更大動機可以大條道理進一步邊緣化甚至趕走晒那些小商戶。

最近一連串事件，反映領展已經將佢嘅經營手法進一步自我妖魔化。一啲位置唔好嘅，改造潛力細嘅，或者面積太細冇乜肉食嘅商場，佢就拆骨招標轉售俾另一些模較細的投資者來經營，領匯就成功把公共屋村嘅商場資產分拆轉售成為自己嘅暴利。當年房委會以批發形式賣出商業資產，領展今時選擇性以零售方式出售謀利，已經違反當初原意，但現在冇佢符，足見當年政府官員、房委會及部分議員毫無洞見能力。另一方面，領展也會將部份經提升的商場街市，外判俾一啲包銷商經營管理，領展自己唔需要直接操作，就可以坐定粒六收取分判支付嘅承辦包銷費用，任由那些背景十分複雜，甚至有江湖後台嘅分判去處理做哂所有dirty jobs。情況就等於澳門賭公司將部份賭廳分判俾疊馬仔去管理營運一樣。良景村市集事件就是一例。

唔好俾我估中，郁完社福設施，領展下一個目標就係去郁嗰啲屋村嘅冬菇亭，即係熟食街市。就算形式改唔到都好，總之就要改到佢變成露天茶座或者連鎖快餐店，或是又一城式美食廣場甚至是名牌食䦉嘅戶外擴展版本。現時在屋村冬菇亭經營熟食檔嘅小本經營者，好快就會冇運行。

到時投訴都無用，呢個低能兼不負責任嘅政府，都係嗰句：「領匯已經成為私營企業，政府冇辦法」。當時政府自己嘅承諾及保證，佢當自己冇講過，亦假設你哋大家已經忘記咗。就算記得又點？政府反口，第一次咩？當年唔係講過高鐵絕對不會伸加工程費嗎？上個禮拜先至再搶咗近二百億。吹呀？

仲有嗰啲曾經支持領匯上市嘅議員都難辭其咎。當年個個都以為自己做個爛鬼立法會議員就好把炮，又話一定會監察政府，又話會監察領匯。而家你哋做到啲乜？叫你地跪係地下向市民認錯都益咗你哋！

So

bang

sherrychan

loklokel