睇樓小心「化妝樓」

folee0001

睇樓小心「化妝樓」

相片來源：《失戀急讓》劇照

撰文

:

肥妹 90後博客

如果筆直（budget )係萬二分重要，咁感覺要係二萬分。肥妹家住天水圍，樓齡十零年，一向都唔覺得屋企特別新特別大（咁個個都嫌自己屋企唔夠大架啦），但原來係見識少，身在屋中不知福，原來無乜特別就已經是舒服。

睇舊樓真係真係真係有助擴闊接受程度架～對於無咩筆直黎講，肥妹嘅建議係，為咗個心舒服啲，可以花啲時間由舊、由平睇起。

「憑感覺」用得啱，有時都真係幾重要，單純因為：你以後要供架喎！以後間屋每個月幫你自動轉走咗筆錢（好辛酸），而依個屋企你將要日日返，間屋絕不能篤眼篤鼻，感覺舒服係基本啦。

舒服程度單睇呎數都未必夠架，要望清楚啲間隔、實用程度。

舊樓嘅設計有時會「好搞笑」，當花時間買個體驗，「欣賞」一下當代設計。有時呎數大嘅單位分分鐘仲難用過較細嘅單位（依個情況，你就會覺得其實細果個單位唔係咁差唧）：無啦啦有啲唔洗等嘅小窗台嘅，廿年前好興嘅電箱外露呀，水電管掛住係牆身呀。

最搞笑係，諗爆頭都諗唔到點解個設計係咁，廁所細到轉身不能，肥妹如我淋浴該會撞瘀吧？廚房無位擺雪櫃，咁洗衣機呢？（依個時候，經紀會話：到時整個開放式廚房搞店晒！千祈唔好信佢。）

然而廳無啦啦有個抽氣扇（雖然個人認為打邊爐係唔錯嘅）⋯好多意想不到嘅設計，在舊樓找得到。

由細筆直嘅舊樓睇起，有比較之下，你會感覺愈來愈好，因為最差最奇特嘅你都看過了。

化妝的舊樓。

新樓化妝都見唔少啦，地板藏菇都有嘅，咁舊樓化妝有幾出奇？

舊樓有時為咗易啲放租，都會輕微搞搞佢，係咁易油下油，舖塊木色膠地板扮木地板，化身成為「化妝樓」。

此時此刻，我好似有少少感受到男人對於濃妝女人嘅期待與恐懼交纏。究竟層樓未化妝之前係點架呢？當你細心留意，都不禁心寒，因為總有蛛絲馬跡讓你找到甩妝嘅一刻。例如係...

哇，牆身滲水喎。
經紀：撇雨唧。
離個窗好遠下喎。
經紀：撇雨乾唔切滲咗過黎唧。
（夷咦，咁都講得出嘅？）

化咗妝都會甩灰，最緊要識睇。可以留意下膠木板下是不是空心，係架，好地地塊地又會崩咗一忽嘅，唔舖好過舖啦，裝修時要俾多個拆地板費。

鐵窗邊緣嘅鐵窗在屯門置樂單橦式都找得到，但都唔好以為鋁窗就好穩陣呀，記住唔好手多多去開窗，隨時都會跌落街⋯但通常依一切，唔識去留意就唔曉去留意，留意唔到仲覺得層樓化咗裸妝，呀都okay喎幾靚仔，以為唔洗點裝修可以即買即住。

仲要留意大廈近年有無進行維修，否則到你買落先知要夾錢維修就大喊錢從何來。

一點take away：sales係信唔過。

其實仲有好多嘢想講，所以應該會有肥體三嘅。

肥妹睇樓初體驗一

原文刊於肥妹facebook專頁，獲授權轉載，標題經編輯修改，原題為「肥妹睇樓初體驗二」。

https://www.facebook.com/onefatmate/photos/a.457818767738094.1073741829.415037552016216/543196712533632/?type=3&theater

fannyl2012

chan328

jp_dannywong

carriewwf