![](https://cdn.thestandnews.com/media/photos/cache/a_SxxBg_1200x0.jpg)
香港維港兩岸,光污染嚴重。(綠惜地球圖片)
最近接到投訴,飽覽維港靚景的尖沙嘴豪宅「名鑄」,受鄰近「彌敦道26」頂樓的大型發光屏幕滋擾。據投訴人話,過去只係開向住維港一面的屏幕,但大概6月開始,向民居的一面都開埋。屏幕夜晚11點左右會熄,不過光度強,直接照射到投訴人長年臥床的爸爸的房間,要長時間拉上窗簾。
![](https://cdn.thestandnews.com/media/photos/cache/ESO-VLT-Laser-phot-33a-07_hoVdA_100x100crop.jpg)
投訴人又話,佢個單位已經唔係重災區,隔鄰的業主,甚至形容「好似活在投影機照射下」。
其實,我地同事2011年都處理過「名鑄」的光污染投訴,當年,鄰近「The One」屋頂的LED閃動招牌,通宵係咁閃呀閃,滋擾到多名「名鑄」業主,其中有業主的單位,由65000蚊減到40000蚊先租得出,減幅有四成咁多。在多名業向環保署投訴後,The One把向住戶的大廣告牌燈光亮度減低,夜晚九至十二時停止燈光閃動,凌晨十二點後更關掉廣告牌。
講番今次的投訴,我地已經去信環保署同埋「彌敦道26」的發展商新鴻基,促請佢地關上或者調低向民居一面屏幕的光度,避免滋擾。總相信,好的企業,絕對應該係社區的好鄰居,唔會將機構的形象,建基係居民的痛苦身上。
後記:環保署今天(6月27日)表示,現時沒有法律管制光污染。不過已經同地產商個邊開會,佢哋同意提早關燈時間由23:00 改到去22:55。而且會分別係晚上7:00 / 7:30 /8:00 調低光度,另外已經將燈嘅轉速調慢到約半分鐘轉一次。管理處會繼續跟進事件
![](https://cdn.thestandnews.com/media/photos/cache/b_9wSVP_1200x0.jpg)
維港兩岸光污染非常嚴重,連住在酒店高層和部份貴價樓的人士也不能倖免。(綠惜地球圖片)