火雞姐反眼玩腳 快樂寶拉扮菠蘿自插
2016-09-27 11:21:00 HKT
火雞姐今日都配合《PEN-PINEAPPLE-APPLE-PEN》音樂拍片自娛。
泰國網絡「女神」Happy Polla噚日拍片都有300萬次觀看紀錄。
洗腦歌《PEN-PINEAPPLE-APPLE-PEN》熱潮直捲亞洲。
洗腦歌《PEN-PINEAPPLE-APPLE-PEN》(PPAP)由日本hit出亞洲,各地網民都開始自拍短片,夾嘴形模仿主唱者PICO太郎嘅PEN-PINEAPPLE-APPLE-PEN騎呢舞步,近月來喺網上熱潮有增無減,熱潮最初由當地中學生掀起,接住亞洲各地網民都開始加入PPAP自拍行列,令原裝MV今日飆升逾400萬次收看。
香港嘅網絡紅人「火雞姐」丁可欣都話要玩埋一份,佢既反眼又擺出八婆樣,更提起雙腳響應呢期大熱嘅PPAP熱,不過論騎呢都唔及泰國網絡「女神」Happy Polla(快樂寶拉),噚日佢上載短片後短短1小時已超過29萬人次瀏覽,單係facebook已破300萬次收看紀錄,重口味指標超越PICO太郎嘅原裝版多多聲。 Happy Polla穿上菠蘿連身裙扮成人形菠蘿,將蘋果藏喺胸前,配合PPAP節奏翩翩起舞,誇張表情夠晒肉緊,當佢手持筆把自己當成菠蘿玩自插「Pineapple Pen」,最後邊露出詭異笑容邊食蘋果,搞笑程度爆晒燈。